Kan ṭhalaite hian an sual bik vang ni loin, suamhmang an tawh vangin ruihhlo an ti - Central YMA President

February 14, Inrinni khan Sub-Headquarters YMA, Champhai chuan Zote Community Hall-ah kum 2026 hruaitu thar hlanna leh YMA kumpuan 'Ruihhlo Do' hawn inkhawm an buatsaih a, kumpuan hawngtu Central YMA president R Lalngheta chuan, Mizo ṭhalaite chuan an sual bik vang ni loin, suamhmang an tawh avangin ruihhlo an tih thu a sawi.

CYMA President chuan ruihhlo ngaiten harsatna an tawh ṭhin dan sawiin, "Ṭhalai in lama haw ngam lo tam tak an awm. Kan ṭhalaite hi an sual bik vanga ruihhlo ti an ni lo, suamhmang an tawk a ni. Chu suamhmang chu ruihhlo zuartute hi an ni a, ruihhlo ngaite an lainatawm. Chhungkaw kehchhia, ruang hlawm tur pawh awm lo khawpa harsatna kan hmachhawn mekte ruihhlo vang a ni," a ti.

YMA hruaitute chu ramchhan tura Pathian hmaa ding tura inngai tur an nih thu sawiin R Lalngheta chuan, "Ruihhlo do kawngah hian hruaitu nihna chelh si, che thei si lo kan awm em? Ruihhlo vangin kan ṭhalaite an thi zawih zawih. Thlanmual thlenga kan thlahliam reng mai hi thil pawi tak a ni," a ti a, YMA hruaitute chu mahni mawhphurhna hlen tura ṭan la thar turin a ngen.

Ruihhlo do kawngah, kohhran leh pawl hrang hrangte nen ṭanho thiam a ngaih thu sawiin CYMA President chuan, "A la ti ve lote venna turin sunday school thlengin hmalak a ngai. Ruihhlo dona kawnga hmalakna chak zawka kalpui a nih theih nan central aṭangin ruihhlo dona atana hman tur motor man cheng nuai 88 zet sanction fel a ni tawh," a ti a, ruihhlo do bakah, hnam dang pasal neih a tlem theihna tura ṭan lak a ngaih thu a sawi.

Inkhawm hi Champhai Sub-Headquarters YMA president T Lalnunsanga'n kaihruaiin, president F Lalrinmuana pawhin thu a sawi. Tun dinhmunah Champhai Sub-Headquarters YMA hnuaiah hian group pathum - Tuipuiral, Vanhnuailiana, leh Vanapa an awm a, branch 67 zet awmin, group huam chhungah branch 43 leh ṭhut hmunah branch 24 an awm.