Sum khawn a awmin mahni lakluh dik tak mila pek mai hi a ṭha - Dr Vanlalthlana

Minister Dr Vanlalthlana chuan, sorkar hnathawkte tan khawtlang leh kohhran aṭanga sum khawn a awmin mahni lakluh dik tak mila pek mai a ṭhat thu a sawi a, "Kan hlawhtlin tirha Pathian hming kan lam zin ang hian kan hnathawhna dawhkanah Pathian kan mamawhna a la in ṭan dawn chauh," a ti

Dr Vanlalthlana hian February 13, Zirtawpni zan khan MS Academy, Aizawl hnuaia zirlai MPSC Combined Exam, 2025-a hlawhtlinna chang mi 14-te lawmpuina inkhawm a hmanpuinaah thu sawiin, sorkar hnathawk ni satliah loa sorkar fawng vuantute hnena rawtna an neih angte sawi chhuak ngam ni turin officer tling tharte a chah a, "Thawkrim leh thiam ngahte chu duhsak pawh an hlawh lo thei lo a, chutih rualin, mahni invawng zahawm ang che u. Khawtlang leh Kohhran aṭangin sum khawn pawh lo awm se, mahni lakluh (income) dik tak mila pek mai a ṭha," a ti.

Mizoramin bung thar a kai chho mek tih sawiin Minister chuan, "Sorkar fawng vuantute hian thil kan hre famkim vek lo a, hmasawnna hi official ram hmangaihtu tak takte vang a ni. Kan hlawhtlin tirha Pathian hming kan lam zin ang hian kan hnathawhna dawhkanah Pathian kan mamawhna a la in ṭan dawn chauh," a ti a; sorkar fawng vuantute leh official-te inkarah thawhhona ṭha a awm a pawimawh thu a sawi.

Khualzahawm MYC chairman Malsawmzuala Ralte pawhin thu sawiin, vanram kaina daltu chu hlawk viau dawnin lang mah se, chatuan nun atan a hlawk dawn loh avanga hnawl ngam turin officer tling tharte a chah a, "Sorkar hna hian mawhphurhna lian pui a keng tel a, he hna in thawhna chhan tur ber chu mipuite rawngbawl a ni," a ti.