MJA member-te'n Jammu & Kashmir-a silk pangang khawina hmunpui tlawh

Press Information Bureau (PIB) buatsaih press tour-a kal mek Mizoram Journalists' Association (MJA) member-te chuan nimin khan Srinagar, Jammu & Kashmir-ah CSB - Central Sericulture Research & Training, Pampore an tlawh.

Press tour-a kal Mizoram journalist-te hi CSB - Central Sericulture Research & Training Institute Dr Sakthivel N leh hotu dangte'n an lo dawngsawng a, inkawmhona leh zawhna leh chhanna hun hman a nih bakah, museum leh mulberry hmunte an tlawh kual a ni.

MJA member-te hian nimin vek khan Srinagar-a PIB Regional Office an tlawh bawk a, Director (M&C), Qazi Mohammad Salman Ibrahim leh officer dangte nen an inkâwm.

PIB, Aizawl chuan MJA member-te tan press tour an buatsaih mek a, February 15, 2026 Pathianni khan Aizawl aṭangin Doordarshan Kendra, Aizawl Regional News Unit director Nampibou Marinmai-a'n PIB pisa kawt aṭangin a vailiam.

DDK RNU director Nampibou Marinmai chuan, PIB-in MJA member-te tana press tour a buatsaihsak chu a lawmpui thu sawiin, "Press tour hi press mite tan a hlu hle a, thil tam tak zir chhuah theihna a ni. Kashmir-ah thil ṭha zir chhuah ngei tum turin inbuatsaih ula, in kalna hmuna in hmuh leh hriatte hmangin Mizoram tan thil ṭha rawn hawn in tum tur a ni. In thil tawnte in media ṭheuhah in ziak chhuak ang a, chu chu Mizoram mipuiin an lo chhawr ṭangkai ve thei dawn a ni," a ti.

PIB Press Tour-ah hian PIB, Aizawl head of office Rajeev Laurembam hoin Aizawl leh district hrang hranga MJA member 13 an kal a, Jammu & Kashmir-a hmun hrang hrang an tlawh dawn a ni.