KHAWTHLIR

Endik dawn

Aizawl Bawrhsap chuan hriattirna chhuahin, Food Civil Supply & Consumer Affairs (FCSCA) department aṭanga thu an hmuh angin, February 2026 aṭang hian IOCL Company-a hnathawkten LPG connection nei zawng zawngte dan ang takin gas an hman leh hman loh te, a him tawk leh tawk lohte an in ṭheuh ah kal chilhin an enfiah dawn tih tarlangin, "A thlawna gas connection hmang (PMUY customers) te hnen aṭangin service charge GST telin Rs 59 leh connection pangngai hmang (non-PMUY customers) te hnen aṭangin service charge GST telin Rs 236 an la dawn. Inspection titute hian uniform hain, ID an awrh tur a ni e," a ti.

Chetsualnaah thi

Mangthanchhungi (51) d/o Phirṭhuam (L), Maubawk Veng chu tun thla tir khan Tlawng road-ah scooter (scooty) khalh an zirnaah a chesual a, damdawi-inah hun eng emaw chen enkawl a nih hnuah nimin zing dar 12:45 khan a hliam tuar loin a thi. Nimin chhun dar 1 khan vuiliam a ni.

MYC-ah fill-up theih

MYC chairman Malsawmzuala Ralte chuan nimin khan Army Recruitment Office-a subedar major Mukesh leh havildar Sandeep-te nen kumin atana Indian Army lak tur chungchanga thawhho dan tur an sawiho a; sipai (agniveer) dilna hi February 13-April 1, 2026 chhungin online-a dilna hun hawn a nih thu te, dil duh apiang tan MYC office-ah office hun chhungin education document leh Aadhaar card kengin form fill up theih a nih thu tarlan a ni.

AI Summit-ah tel

Artificial Intelligence (AI) Impact Summit, 2026 chu nimin khan Bharat Mandapam, New Delhi-ah neih ṭan niin, AI huanga mi pawimawh - innovator, startup, industry hruaitu, leh public institution hrang hrang hotute an fuankhawm a; summit-ah hian Mizoram sorkara Finance department empanelled firm leh ISO certified company - iNext System Pvt. Ltd., Zarkawt, Aizawl founder & director S Vanlalhriata pawh a tel. iNext System Pvt. Ltd hian data centre neiin cloud service hrang hrang an pe chhuak a ni.