Vawiinah Assembly Session ṭan dawn

March 16, 2026 thleng awh tur Mizoram Legislative Assembly pakuana ṭhutkhawm vawi rukna vawiin chawhma dar 10:30 aṭangin Assembly House-ah neih ṭan a ni ang.

Assembly budget session lo awm tur atan hian nimin tlai thleng khan House chhunga chhan chi zawhna (starred question) 1,223 a lut tawh a, ziaka chhan chi (un-starred question) 407 a lut tawh bawk. Amendment bill pathum leh bill pangngai pakhat a lut tawh.

Session ṭan niah Gover­nor Gen VK Singh chuan thu a sawi dawn a, February 26-ah kum 2026-2027 Mizoram budget chu Finance enkawltu chief minister Lalduhoma'n a pharh ang.

Bill lut tawhte chu - 'The Mizo Marriage Divorce Inheritance of Property (Amendment) Bill, 2026' te, 'The Mizoram Goods and Services Tax (First Amendment) Bill, 2026' te, 'The Mizoram (Prevention of Public Land Encroachment) Bill, 2026' leh The Mizoram Jan Vishwas (Amendment of Provisions) Bill, 2026 a ni.