Mizote thil siam chhuah leh kut chhuak zawrhna tlangzarh

Nimin khan Raising and Accelerating MSME Performance (RAMP) MZ4 Marketing Intervention hmalaknaa siam Mizote thil siam chhuah leh kut chhuak chi hrang hrang zawrhna website MadeByMizo.com chu Lianchhiari Rûn conference hall-ah Commerce & Industries minister F Rodingliana'n a tlangzarh.

Commerce & Industries Minister chuan Mizote hi IT platform hmangin sumdawng ve tawh mahila, a leitu leh hralhtute tana platform rintlak, belhchian dawl erawh ala awm loh thu a sawi a, "Tunah chuan ram pawn lama leitute pawhin an rinngam theih tur khawpa e-commerce sumdawnna ruahman a ni ta hi a lawmawm," a ti.

MadeByMizo.com website hi Mizo thil siam hrang hrangte quality ṭha bik, mumal taka thlan chhuahte pholanna leh state pawn lam market-a thawn chhuahna platform a ni. Mizo kut chhuak leh Mizoram raw material ngei hmanga thil siam chauh pholan a ni a; raw material lakna, thil siamna hmun leh a siamtute chungchang chhui zui theihnate ngaih pawimawh a ni.

Website-ah hian thil siamte chu category hrang hrang – ei leh in, thuam-hnaw, hriselna kaihhnawih, handicraft leh a dangtea thliar hran an ni.