Manipal Hospital EM Bypass-te'n MUHCS kaltlangin Cancer leh natna dangte an enkawl thei

Manipal Hospital EM Bypass hotute chuan Kolkata leh Siliguri-a an damdawi-inteah Mizoram Universal Health Care Scheme (MUHCS) kaltlangin cancer leh natna dang hrang hrang an enkawl theih thu an sawi a; Mizoram chu India rama cencer vei tamna a nih avangin mipuiten an hriselna an enkawl uluk a ṭul thu leh natna hmuh chhuah hma leh enkawl hma a pawimawh thu an sawi.

February 14, Inrinni khan Aijal Club-ah Manipal Hospital EM Bypass-a doctor-te chuan thuthar thehdrahtute kawmin, Mizorama cancer leh natna hrang hrang veite chu Kolkata leh Siliguri-a an damdawi-in (Manipal Hospital EM Bypass)-ahte an enkawl theih thu an sawi a ni.

Manipal Hospital EM Bypass consultant Dr Poonam Patil chuan, an damdawi-inahte hian cancer veite enkawl kawnga thiamna bik nei doctor (oncologists) leh hmanrua ṭha tak tak nen kum tam tak chhung cancer veite an lo enkawl tawh ṭhin thu a sawi a, "Cancer mai piahlamah natna hrang hrang kaihhnawih (neurology - neurosurgery, cardiology-cardiac surgery, urology-kidney diseases, gastro, orthopaedic) pawh kan enkawl thei a, Mizoram sorkar hmalakna MUHCS kan thlunzawm avangin Mizo damlo tan kawng a awlsam lehzual," a ti a; case hrang hrang an lo enkawl tawhah natna hmuh chhuahte hi a tlai lam deuh vek ṭhin a, Mizoten mahni hriselna dinhmun an chîk ṭhin a pawimawh thu leh a hun tak leh a hma lama natna enkawl theih chu duhthusam a nih thu a sawi.

Medical Oncology consultant Dr Chinnu Jomi pawhin Kolkata leh Siliguri-a an damdawi-inte chu pan awlsam tak an nih thu leh heng damdawi-ina thawk zingah hian hmarchhak mite pawh an awm thu sawiin, Mizoram aṭanga cancer vei damlo, a bika enkawlna mamawh an pun zel avangin Manipal Hospitals chuan damlote'n inenkawlna an dawn tlai loh nan te, damlo in refer-na kawnga chak zawka thil tih a nih theih nan leh harsatna a awm loh nan hma an lak zel dawn thu a sawi bawk.