Chief Minister-in Tlawng lei a hawng; Sorkar laipui kan lakah an inhawng - CM

Nimin tlai khan chief minister Lalduhoma chuan Lengte kaia Tlawng lei, 'Faith Biridge' tia a hming an phuah chu a hawng. CM chuan, sorkar laipui chu Mizoram tan an inhawn thu a sawi.

Chief Minister chuan, Mizoram tan central sorkar an inhawng hle nia sawiin, "A bik takin Union Minister of Road Transport & Highways Nitin Gadkari hian Mizoram min duhsak a, a chungah pawh kan lawm hle. Kan mamawh ka zuk sawi apiang mai hi min la tihhlawhtlinsak deuh vek a ni. Hetianga central lama kan hruaituten inhawng taka min ngaihthlak lai hian chak taka hnathawh kan duh a, duhsaktlaka kan thawh ṭhat a ṭul," a ti.

December, 2024 lamah khan Faith Biridge chhuat hi crane hmanga hnuh kai tuma a nih thu sawiin Lalduhoma chuan, "A khaina hrui pakhat a chat a, an hlawhchham. Hun eng emaw chen an han inbuatsaih leh a, April 7, 2025-ah hnuhkai an han tum leh a, contractor-ten Kristian puithiamin hlan hmasa se, an ti a ni. Lengpui Pastor Rev. Lalchungnunga Hauhnar-in a hlan a, harsatna tawk loin, awlsam takin an hnukkai ta," a ti a, a hming atana Faith Bridge phuah pawh hi a inhmeh thu a sawi.

Chief Minister chuan, Faith Bridge hian awl­samna a thlen dawn tih sawiin, "Kan ram economy chawi­kanna kawngah a ṭangkai hle ang. A siamna tur sum min petu MoRTH chungah te, a thawktu PWD chungah te, design consultant M/s Force Structural Engi­neering Pvt Ltd., Navi Mumbai te, proof consultant IIT Bombay te, safety consultant M/s Engineering Project Consultants, Thane leh contractor Poddar Infra Tech chungahte lawmthu kan sawi a ni," a ti.

Lei hawnaah hian PWD minister Vanlal-hlana leh adviser to CM TB Lalvenchhungate pawhin thu sawiin, Lok Sabha MP Richard Vanlalhmangaiha, minister leh MLA eng emaw zat an tel.

Technical report-a tarlan a nih danin, lei dawh nan hian MoRTH-in cheng vbc 42.44 a sanction a, load capacity chu metric ton 385 a ni. A lei chhuat pawh kai tak rih zawng kha 430 MT a ni a, khawvela hrui hmanga lei thir hnuh kai rit ber zinga mi nia sawi a ni.

Bridge dawh chhûng zawng hian hna thawhna hmanrua leh hna thawhte quality test reng a ni a, bridge dawhna bulah site laboratory dah a ni. PWD aṭangin laboratory assistant leh contractor lam aṭangin laboratory assistant-ten test chi hrang hrang an kalpui zel. Rawra leh balu hi Silchar aṭanga lakluh a ni.

Bridge structure hi Rourkela-ah siam a ni a, a part hrang hranga phurh thlen niin zawmkhawm chawp a ni. Bridge hangers atan hian Thailand rama a bik taka siam carbon steel tension rods an hmang. Lei dawh zawh a nih hnuah load test neih a ni a, test result a ṭha a, lirthei eng chi pawh a tlan thei.