e-KYC tihnaah pawisa chawi a ngai lo

Serchhip district bawrhsap Paul L Khuma hoin nimin khan Electronic Know Your Customer (e-KYC) tihnaa pawisa chawi kaihhnawiha Serchhip District Consumer Association (SDCA)-in Serchhip MIZOFED laka complaint an thehluh chungchang sawiho a ni a; e-KYC tih nan pawisa chawi a ngaih loh thu tarlan a ni.

Sorkar thuchhuah tarlan danin, SDCA hian Serchhip MIZOFED lakah complaint hi thehlutin, thawktu ṭhenkhatten e-KYC tihnaah consumer-te hnen aṭangin pawisa la ṭhin an awm niin an tarlang. MIZOFED Manager chuan hemi chungchangah hian mi ṭhenkhatin MIZOFED-a thawktute e-KYC tihtir tura koin, an kal man tum sakte an lo awm niin a sawi a, a hriat veleh ti tawh lo tura a hriattir nghal thu a sawi.

Ṭhukhawm chuan, "Tun hnuah consumer-in e-KYC tih nan pawisa engmah an chawi tawh tur a ni lo a, hetiang thil a thleng leh a nih chuan IOC thuneituten MIZOFED lakah hremna an lek kawh tawh ang," an ti.