KHAWTHLIR

Zirlaite'n thisen pe

Nimin khan Pachhunga University College NSS unit chuan thisen pek an huaihawt a, Civil Hospital, Aizawl tan thisen unit 200 an pe a, petute mipa 156 leh hmeichhia 44 an ni. Mizoram Polytechnic, Lunglei NSS leh Red Ribbon Club pawhin nimin khan Civil Hospital, Lunglei tan thisen unit 86 an pe a, petute mipa 75 leh hmeichhia 11 an ni.

Zu an man

Sairang Branch YMA chuan February 16, Thawhṭanni chhun leh zan khan an huam chhung kawng sir leh rama thuhruk sapzu (Royal Stag) case 52 (um 624) an man. Zu neitu hi hriat a ni loa, a tihral dan tur an la ngaihtuah ang.

Convergence workshop

Mamit DC Subigya S Chandra kaihhruaiin nimin khan DC conference hall-ah Mamit khawpuia sorkar department thlan bikte pualin 'Convergence Workshop' buatsaih a ni a; SIRDPR core faculty Dr C Lalthlansanga'n inchhunfinna (conver-gence) chungchang sawifiahin, department hrang hrangten an scheme neihte leh department dang scheme-te nena an scheme neihte chhunfin theih dan turte an sawiho nghal.

Dan loa thing kih phal lo

Kawrthah Forest Division chuan tun hnai khan Zawlnuam khaw bulah phalna nei loa tractor pakhata phurh teak thing engemaw zat an man a, a mawhphurtute hi an tlanbo hman a ni. Kawrthah Forest Division chuan Mizoram leilung leh ramngaw hausakna venghima, humhalh tura hma an laknaah mipuite thlawp leh bengvar chhuahpuina a ngen.

Ramri khar

Lawngtlai district bawrhsap Donny Lalruatsanga chuan thuchhuah siamin, Lawngtlai district-a Myanmar leh Bangladesh ramri inkalpawhna zawng zawngchu thuleh awm hma chuan khar vek a nih thu leh phalna nei lo ramdang mite ramri pela Mizorama an loluh khap a nih thu a tarlang a; "Ramri kâna zin emaw, sumdawn - bungraw lak leh thawn chhuah khap tlat a ni a, Lawngtlai district lirthei mai bakah district dang lirthei a huam ang," a ti.