MLA-in Aizawl West Outlet hna enfiah

Aizawl West-II bialtu MLA Lalnghinglova Hmar, MoS chuan nimin khan a bial Aizawl West-II chhunga Tuikual lui hrûl kawngpui, 'Aizawl West Outlet' siam hna thawhna tur hmunhma a tlawh a; storm drain project (tui luankawr siam hna) nena ṭang-kawpin kawngpui hi siam a nih tur thu a sawi.

Lalnghinglova Hmar chuan, Aizawl West Outlet project hmang hian Aizawl tlâklam venga Tuikual South (A) huam chin Lalrina turning point-a laklawh taka motor kawng tawp mai chu Dinthar veng, Ebenezer Hospital bula chhuak turin intlawhpawhna kawngpui siam a nih tur thu a sawi a, "Storm drain project nena ṭangkawpin kawngpui hi siam a ni dawn. Rikrum thilah te, chhiatni ṭhatni, faina leh hriselna bakah bawlhhlawh sawngbawl leh nitin khawsak kawngah mipuite tan a ṭangkai dawn hle a ni," a ti.

Hna hi zawhfel a nih hunah chuan Aizawl khawpui traffic jam pawhin nasa takin a ziaawm phah thei dawn nia sawiin Lalnghinglova Hmar chuan, he project hlenchhuah a nih theih nana thawktu Urban Development & Poverty Alleviation department chungah leh veng chhung mipui thlawpnaah lawmthu a sawi bawk..

Project endikna-ah hian UDPA executive engineer C Malsawma bakah kawngpui riruang duanga, a siam hna enkawla vil zui tura rawih ARDECO Design Build aiawhte, contractor, Studio Hamlet Architects leh khawtlang hruaitute an tel a; harsatna hrang hrang awm theite leh a chinfel dan tur te, ṭha tak leh chak taka hna thawh a nih theih dan turte an sawiho nghal.

Aizawl West Outlet project hi SASCI hnuaia khawpui tui luankawr siam hna ‘storm drain project’ nena ṭangkawpa thawh tur niin, kKm. 1.6-a thui, feet 12-a zau kawngpui bakah, feet 4-a zau foothpath awm thei tura ruahman a ni. Tui luankawr RCC feet 8-a zau felfai taka siam tur niin, he hna thawhna atan hian belhkhawmin cheng vbc 30 ruahman a ni.