SHG-te hman tur lirthei vailiam
Rural Development minister Prof Lalni-lawma chuan nimin khan open gym, Secre-tariat Complex aṭangin Mizoram State Rural Livelihoods Mission (MzSRLM) hnuaia Aajeevika Grameen Yojana Express (AGEY) ten RD block 12-a self help group (SHG) te hman tur lirthei 19 a vailiam.
Prof. Lalnilawma chuan MzSRLM ṭan tirh hunlai a mitthlaah a awm thu sawiin, "Mizoram University-a ka thawh laiin state sorkarin MzSRLM kalphung zir tura a sawmte zingah ka tel a, Andhra Pradesh-a SHG nuho kan kawm a ni. Mizo nuho zingah mahni ro inrel a, ruahmanna siam a, mahni eizawnnaa hma la thei an awm hun ka nghakhlel ṭhin," a ti.
Kum 2013 aṭanga bulṭan chu kum 10 chuang a liam hnu chuan SHG-te’n thil siam chhuah lama hmasawnna an ngah thu sawiin RD Minister chuan, "Department lam an ṭang a, MzSRLM pawh a kal dan an sawi dang hret hret a, hotute an phur ang bawkin SHG nuho an phur a pawimawh a ni, a ti a, SHG member lirthei dawngte chu an mawhphurhna a san thu hrilhin, a rulh dan tur ngaihtuah tel turin a chah.
Ni za inhlawhna leh eizawnna thlunzawm tura hma lak a ni tih sawiin RD Minister chuan, "RD block tin aṭangin presentation an nei a, an feh kawng tur siam chhoh zel tum a ni. 'Selhel’ brand hmangin SHG thil tharte kan zuar chhuak dawn. Ka pisaah he’ng thilte hi a dahna siamin ka pho chhuak," a ti.
RD Minister-in motor a vailiam hi Mahindra Pik Up 17 leh Maruti Super Carry 2 niin, Lungsen, Aibawk, Khawbung, Tlangnuam, Lunglei, Kawrtethawveng, Zawlnuam, East Lungdar, Sangau, Thingsulthliah, Reiek leh West Phaileng-a SHG member-te hman tur a ni.
AGEY hi August 2017 aṭanga hman tan niin, DAY-NRLM hnuaia sub-scheme a ni. AGEY-in a tum ber chu thingtlanga awm SHG member-te sum lakluhna hmanrua tur, khaw mipuite’n ṭangkai taka bazar, zirna-in, leh damdawi-in kalna atana hman tur leh khaw chhehvel ei leh bar hmasawnna thlen thei tur lirthei ruahmansak a ni.
He programme hnuaiah hian MzSRLM aṭangin Cluster Level Federation (CLF)-te hnenah AGEY atana hman tur sum pek niin, pung awm loin SHG member-te hian lirthei lei nan pukin, kum ruk chhungin an rul zo leh tur a ni.