PMIS hmanga Mizo ṭhalaite hamṭhatna tur sawiho

Labour, Employment, Skill Development & Entrepreneurship (LESDE) minister Lalnghinglova Hmar kaihhruaiin February 16, Thawhṭanni khan Miozram sorkar hotute leh sorkar laipuia Ministry of Corporate Affairs secretary Deepti Gaur Mukerjee leh officer-te'n Secretariat conference hall-ah Prime Minister’s Internship Scheme (PMIS) chungchang an sawiho.

Lalnghinglova Hmar chuan, Prime Minister’s Internship Scheme thil tum tlangpui sawiin, "He scheme kaltlang hian ṭhalai kum 21-24 inkar, high school leh a chunglam college leh ITI zirlaite'n India ram company lian tak takahte internship an tih theihna tur leh chumi hnua an thawh chhunzawm zel theihna tur kawng dappui tum a ni," a ti.

Deepti Gaur Mukerjee chuan ṭhalai tam takte'n lehkha an zir zawhah hna zawn ngaihna an hriat loh ṭhin thu a sawi a, "Company leh industry lianahte thawhna tur leh thawh dan kawng kalhmangte an hriat theih nan PMIS hi a pawimawh hle," a ti a; Mizo ṭhalai a tam thei ang berin hlawhtlinpui ngei se an duh thu a sawi.

Sawihonaah hian hmalak dan tur hrang hrang - zau zawka awareness campaign buatsaih ni se, Indian Institute of Corporate Affairs, Institute of Chartered Accountants leh Institute of Company Secretaries of India-te nen thawhhona ṭha zawk neih ni se, an ti a; company lian tak taka Mizo ṭhalaite an thawh theihna tur leh lehkha zir chunga hna an thawh theih dan turte dap zel an rel bawk.