Kolasib MJA-in inkhawmpui an hmang

Kolasib District MJA chuan nimin khan Itanagar, Arunachal Pradesh-ah inkhawmpui an hmang a, Arunachal Mission Field West field secretary Rev John F Lalhmingliana'n a hmanpui.

Rev John F Lalhmingliana tunlai khawvela media-te hmasawnna, a ṭha zawng leh a chhe zawnga a te sawiin, khawvel leh Mizoram media boruak karah Kolasib media-te tha thlah loa tang zel turin a fuih.

Kolasib MJA president Andrew Vanlalauva chuan MJA member-te chu mipuite hnena chanchin thar pek chhuah kawngah ṭan lak an ngaih thu sawiin, "Tunlaiah Mizoram chhungah, an hausak chhan sawi chian hleih theih loha hausa thar thut thut an awm te, zu leh drugs hluar zelte chu veiawm," a ti.

Kolasib MJA-te hian an district chhunga hmalak dan tur relin, faina leh zirna kawngah an district-in hma a sawn lehzual theih nan hma lak ni se, an ti.

Kum 2026-2028 chhunga an hruaitu atan president-ah C Zomuanpuia, vice president-ah Zairemchhunga leh treasurer-ah Lalnunmawiate an thlang.