Tar pension-a inthun a har chhan sawifiah

Social Welfare minister Lalrinpuii chuan nimin Assembly Session-ah tar pension (old age pension) dawng tura inthunluh a har chhan a sawifiah.

ZPM member Lalmuanpuia Punte zawhna chhangin Lalrinpuii chuan, "Ministry lamin Mizoram tana quota a siam chu tar pension-ah mi 24,524, hmeithai pension-ah mi 2,278, pianphunga rualbanlo tan mi 722 leh BPL chhungkua anmahnia eizawngtu ber an thiha pek turah mi 197, a vaiin mi 27,721 rawn bituk," a ti.

Social Welfare Minister chuan ministry lamin pension dawng thei tur bituk a neih avangin inthun belh a harsat thu sawiin, "Mitthi an awm chauhin a inthun belh thei," a ti a, mitthi an awm hma chuan a dawng ngaiin an dawn char char thu a sawi.