Phal lohna hmuna bawlhhlawh paihte thuneitute hnena thlen zel turin ngen

Serchhip district bawrhsap Paul L Khuma hoin nimin khan Serchhip Town Sanitation Task Force an ṭhukhawm a; sorkarin bawlhhlawh paihna hmun tura a siam hmun bik ni loah bawlhhlawh paih phal a nih loh thu tarlan niin, phal lohna hmuna bawlhhlawh paih ṭhin hriate chu thuneitute hnenah thlen zel turin an ngen.

Sorkarin bawlhhlawh paihna hmun tura a siam hmun bik ni lo, hmun danga bawlhhlawh paih chu dan bawhchhiatna a nih thu tarlan niin, phal lohna hmuna bawlhhlawh paihte chu dan anga hrem theih an nih thu leh, phal lohna hmuna blawhhlawh paih ṭhin an awm chuan thuneitute hnena thlen zel turin ṭhukhawm chuan an ngen nghal a ni.

Tarlan danin, sorkar leh Green Herd SP ṭangkawp chuan Serchhip district-a khaw hrang hrangah leh Serchhip khawpuia veng ṭhenkhatah bawlhhlawh khawnkhawm leh sawngbawl hna an thawh mek. Green Herd SP-ten bawlhhlawh an la khawn theih lohna khua hi Serchhip khawpui pawnah chuan khaw panga chiah a awm tawh a, Serchhip khawpui chhung bikah chuan New Serchhip huam-chhungah kalpui ala ni lo bawk.