Mizorama khawpui fai ber nihna Siaha khawpuiin an lawm

Siaha khawpuiin Mizoram Cleanliness Competition, 2025-a Mizoram khawpui fai ber lawmman an lak chu February 17, Thawhlehni khan MADC Golden Jubilee Hall-ah lawm a ni a; MADC chief executive member M Laikaw leh district bawrhsap VL Hruaizela Khiangte-ten an hmanpui.

M Laikaw chuan, Mizoram khawpui fai inelna district headquarter level-ah pakhatna dinhmun Siaha-in a hauh chu a lawm thu leh thawktute zawng zawng a lawmpui thu a sawi a, "Kan dinhmun aṭang hian tlahniam tawh lo turin ṭang mar pat ang u. District-huapa lawmman lak bakah khua leh veng bil anga lawmman lak tumin ṭan kan lak zel a pawimawh," a ti.

Bawrhsap VL Hruaizela Khiangte pawhin, "Faina kan ngaih pawimawh avangin kum tluana fai kan tum a, varṭianah tual phiat pawlin an phiat a, kawngkama lirthei inhung rei tawh leh insakna bungrua chhêk rei tawh endik pawl an awm bakah, ṭhutkhawm leh rorel a tam em em a, sorkar hmalaknate tlawmngai pawl leh mipuiin kan thlawp ṭhat avangin pakhatna lawmman kan la thei a ni," a ti a; faina kawnga an ṭanho ang hian district hmasawn nan leh ruihhlo do kawngahte ṭangrual zel turin disrtict mipui a sawm.

Tarlan danin, khawpui fai inelnaah hian kawng hrang hrangin endikna kalpui a ni a, mark hmuh theih pum pui hi 4,500 niin, Siaha hian mark 3,485 a hmu a ni.