Hri danna pek kawnga thawhho zel an rel

Lawngtlai district bawrhsap Donny Lalruatsanga hoin nimin khan Bungtlang South Block Immunization Committee chuan Bungtlang Siuth BDO huam chhunga hri danna pek beihpui thlak dan tur an sawiho a; theihtawp chhuah thawhho zel an rel.

Donny Lalruatsanga chuan, tihdam aiin inven a ṭhat zawk thu sawiin, "Hri danna (vaccine) lak kawngah harh thar a ṭul hle. Lawngtlai district dinhmun thlirin hmasawnna tur tam tak ala awm. Block hmasawnna turin sorkar bakah VC leh NGO-te an pawimawh hle a ni," a ti a; district administration nena pheikhai rual taka kal a ṭul thu a sawi.

Ṭhutkhawmah hian WHO consultant Dr PC Vanlalhlui, WHO EM Lalnunhlimi leh Bungtlang South medical officer Dr Lalramchhana ten hri danna lak pawimawhna hrang hrang leh hmalak dante an tarlang a; vaccine lak kawngah hmasawnna tur tam tak a awm tih pawm tlangin, theihtawp chhuah thawhho zel ni se, an ti.