KHAWTHLIR
Anganwadi sakna tur hmuh a ni
Social Welfare, Women & Child Development minister Lalrinpuii chuan nimin Assembly Session-ah kum 2025-2026 chhungin Ministry of Women & Child Development aṭangin anganwadi centre sakna tur cheng vbc 1.23 hmuh a nih thu MNF member Prova Chakma zawhna chhangin House a hrilh.
D.El.Ed result
Mizoram Board of School Education chuan vawiin chawhnu dar 2 hian Diploma in Elementary Education (D.El.Ed) Examination, 2025 (December) result a tichhuak dawn a, result hi MBSE pisaah leh website www.mbse.edu.in ah en theih a ni ang.
Inven dan tur sawiho
Lawngtlai district bawrhsap Donny Lalruatsanga kaihhruaiin February 17, Thawhlehni khan DC conference hall-ah damdawi hmansual theihte zawrh leh hralh laka inven dan tur sawiho a ni. Donny Lalruatsanga chuan, damdawi zuartute zingah sorkar thawhpui ṭha duh lo an awm ṭhin thu sawiin, thupek chhuah thuai a nih tur thu a sawi a; damdawi zuarte chuan tun laia damdawi ti ṭhinten damdawi lei an tum ṭhin tlangpuite an tarlang bawk.
Kum tling lo inneih khapna dan zirho
Siaha District Hub for Empowerment of Women leh Women & Child Development ṭangkawp chuan nimin khan MADC Golden Jubilee Hall-ah ni 100 awh tur naupang kum tling lo inneihna ven kawnga inzirtirna an buatsaih a; Siaha CDPO Hepaw Hlychho-in a hmanpui. Prohibition of Child Marriage Act leh Mission Shakti chungchang inzirtir a ni.
Nghakuai chiah kût
Champhai DC Mohammad Aaquib kaihhruaiin nimin khan District Level Committee on Post Completion Management & Maintenance of Reservoir-cum-Recreation Centre, Keilungliah an ṭhukhawm a; eco-tourism tihhmasawn te, tui chhung nungchate tih dan phung dik zawka man tura mipui hnena zirtirna atante March 26-27, 2026 khian Keilungliah tuikhuahah 'Nghakuai Chiah Kût' buatsaih an rel.
Mamitah sorkar hnathawk training
SIRDPR chuan nimin khan Mamit khawpuia LAD conference hall-ah Mamit khawpuia sorkar office-a hnathawkte pualin ni khat awh hna thil atana ṭul hrang hrangah inzirtirna an buatsaih a; additional DC Carolyn L B Khiangte-in a hawng. Training-ah hian SIRDPR core faculty Dr C Lalthlansanga leh AF K Lalmuanzova-ten kalkhawmte thil pawiawh hrang hrang an zirtir a ni.
Ṭamdil Management Committee ṭhu
Saitual district bawrhsap Srinivas Sadi kaihhruaiin February 17, Thawhlehni khan Ṭamdil Management Committee chuan Ṭamdil leh a kaihhnawih thilte leh enkawl zel dan turte an rel a; Ṭamdil leh a chhehvela ram awm dan enfel tura hmalak te, ICDS aṭanga hoarding tar dilnate leh Ṭamdil chhung luh man chungchangte bakah, Ṭamdil Upgradation Pro-moter aṭanga Ṭamdil tih-changtlunna tur rawtna (proposal)-te an sawiho a ni.