House-ah bill pahnih pawm

Nimin Assembly Session-ah Taxation changtu chief minister Lalduhoma putluh 'The Mizoram Goods and Services Tax (First Amendment) Bill, 2026' leh Revenue minister B Lalchhanzova putluh 'The Mizoram (Prevention of Public Land Encroachment) Bill, 2026' te chu pawm a ni.

Chief Minister chuan amendment bill a putluh chu state tina zawm ve ngai a nih thu sawiin, "Amendment siam hi kan rawt leh putluh pawh a ni lo. Central-in an duhdan kan lo zawm vena tur a ni mai. Sawi chiam dawn pawh ni ila a ṭangkai tehchiam pawhin ka ring lo. Zawhnate inzawt dawn ila, ka chhan thiam loh pawh a tam ang. State tinin a lo tih ve ngai a ni mai. Loh theih loa pass chi a ni," a ti.

B Lalchhanzova chuan bill a putluh chungchang sawifiahin, dan hman mekah Mizoram tana fuh tawk lo a awm nual thu a sawi a, "The Mizoram Prevention of Govt Land Encroachment) Act, 2001 thlakna tur a ni. Kum 25 lai kan hmang tawh a, a chak tâwk lo hle. Sorkar ram tia kum 2001-a dan siamin a huap zo loin a lang," a ti.

Dan putluhin a tum ber tur chu, sorkar ram tih ṭhinte public land tia dah thar tura rawt a nih thu sawiin Revenue Minister chuan, "Khawtlangin vantlang ram nia ngaih a awm mai. A pass awm chuang si loin vantlang ram angin kan ngai," a ti a, vantlang ram venhimna zau zawk pek an tum thu a sawi.

Revenue Minister sawi danin, inquiry tih dan turte mumal taka rawt chhoh a ni. A hmaa thla khat chhung jail bang zut leh Rs 2,000 chawi tihte kha, thil tisualtu Rs 10,000 chawi bakah, a ram luah emaw cheibawl a chhuahsan hma chuan Rs 5,000 ni tina chawi theihnate dah a ni. Vantlang leh sorkar ram humhalhah DC-te mawhphurhna pek an ni.

Vantlang rama vantlang tana hnawksak lehzual chi-a che te chu district magistrate emaw, executive magistrate-te an thuneihna hmang thei tura pek a ni.