CS kaihhruaiin mipui tana sorkar dawr awlsamna kalpui tur sawiho

Chief secretary Khilli Ram Meena kaihhruaiin Fenruary 18, Nilaini khan sorkar hotuten mipui tana sorkar dawr awlsamna tura sorkar dan leh hrai tihtlem kawnga sorkar laipui hmalakna ‘Compliance Reduction and Deregulation Phase II’ chungchang an sawiho.

Compliance Reduction and Dere-gulation Phase II-ah hian priority area 23 leh optional priority area panga thlan chhuah niin, heng zingah hian insak phalna awlsam zawka pek te, sumdawng mite tana license neih ngai tihtlem te, kawlpetha rang zawka thlunzawm dan tur te, khualzinte tana thlenna tur nuam leh tlawm siam leh thil dangte a awm.

Khilli Ram Meena chuan, sorkarin mipui zawm tur dan leh hrai a tihtlem chu mipui tan sorkar dawr a awlsam zawkna tur a nih thu a sawi a, "Ram hmasawnna atana thil pawimawh tak a ni. Phase I-ah ngaihpawimawh bik priority area 23 zinga 17 chu Mizoram sorkarin a tihlawhtling tawh," a ti.

Centre’s Task Force on Deregu-lation and Compliance Reduction Cabinet Secretariat special secretary KK Pathak pawhin thu sawiin, phase I-ah khan Mizoram chu India ram state hrang hrangte zingah 12-na a nih thu leh phase I-a Mizoram sorkar hnathawh chu fakawm a tih thu a sawi a; phase II-ah chuan hei aia tiṭha lehzual turin sorkar hotute a fuih.