NHIDCL-in an intiam anga a hun taka kawng siam zawh an tum thu an sawi

Kolasib district bawrhsap Robert C Lalhmangaiha hoin nimin khan Kolasib district huam chhunga national highway thawmṭhat chungchang leh tun hnaia NHIDCL-te laka pawl ṭhenkhatin lungawi lohna an lantir chungchanga hmalakna hrang hrangte thlirho a ni a; NHIDCL aiawhte chuan an intiamna anga an hna chu a hun taka zawhfel an tum thu an sawi .

Robert C Lalhmangaiha chuan, tun hnaia lungawi lohna lantir a nih laia buaina lian zual a awm lohna atana thawktu zawng zawngte chungah lawmthu a sawi a; kawng siam hna chu chak zawka kalpui tur leh an intiamna anga a hun ruat chhunga hlenchhuak ngei tur leh sum a awm a nih chuan a hun takah contractor-te bill tâng pe chhuak turin NHIDCL hotute a chah.

Kolasib DC chuan tlawmngai pawl, VC leh MJA-te chu thawhpui chhunzawm zel turin a sawm a, mipui tana thil pawimawh kawng siam hna chu lo enpui a, lo vilzui turin a ngen nghal a ni.

Kolasib SP Lalrinpuia Varte pawhin thu sawiin, buaina lian tham zawk a thlen loh nan police-ten theihtawp an chhuah ṭhin thu a sawi a, muanna a awm theih nana magistrate leh YMA-te thawh-puinaah lawmthu a sawi bawk.

Thlirhona hunah hian NHIDCL aiawhte chuan an intiamna anga an hna chu a hun taka zawhfel an tum thu an sawi rualin, an hmalakna tura an mamawhte an thlen nghal a; ṭhukhawm chuan kawng ṭha a awm theih nan theihtawpa thawhho zel an inhuam thu an sawi a ni.