Governor-in State Day thuchah a tichhuak

Vawiin hi state atana Mizoram puan a nih champha (State Day) a ni a; Governor Dr Vijay Kumar Singh chuan State Day pual hian thuchah tichhuakin, State Day chu Mizo mipuite chhelna, inpumkhatna leh suangtuahna a taka nemnghehna a nih thu a sawi.

Governor VK Singh chuan, Mizoram mipui State Day chibai bukin, February 20, 1987 khan Mizoram chu India ram state 23-na ni tura puan a nih thu a sawi a, "He ni chhinchhiah tlak tak hi Mizo mipuite chhelna, inpumkhatna leh suangtuahna a taka nemnghehna chiang tak a ni," a ti.

Dawhkan kila inbiakna, mipui thlan rorelna leh inremna a taka tih hlawhtlinna lantirna a nih thu sawiin Larsap chuan, "Hei hi chiang takin June 30, 1986-a sorkar laipui leh MNF-te inkara inremna thuthlung ziah khan a entir," a ti a; he inremna hi India ram chanchina inremna thuthlung ziah tawha hlawhtling leh tlo berte zinga mi a nih thu a sawi.

State nih hnuin Mizoram chuan kawng tinrengin hmasawnna hmel thar chhinchhiah tlak tak tak a hmuh thu Governor chuan a sawi a, "Ram pum huapa hriat a hlawhna em em hnam ziarang hausa tak, nunphung nghet tak leh khawtlang inlungrualna hloh chuang loa zirna, hriselna, hmasawnna ruhrel din leh ngelnghet siam kawngah pawh nasa takin hma a sawn a ni," a ti.

Governor chuan Mizoramin tun hnaia hmasawnna langsar zual a neih zingah September 13, 2025-a Prime Minister-in km 51.38-a thui Bairabi-Sairang rel kawng a hawn kha a nih thu sawiin, "Hei hian a vawi khat nan Aizawl chu India ram khawpui dangte nen rel hmanga thlunzawm a ni," a ti a, hmasawnna hian zin veivakte remchanna siam sakin man tlawm zawka zin, bungraw phurh leh khualhip thlengin nasa takin danglamna a siam thu a sawi.

GOVERNOR TARLAN DANGTE

☑ May 20, 2025 khan Mizoram chu India rama ziak leh chhiar thiam vekna state hmasa ber (98.20%) a puan a ni.

☑ Hei hi zirna huapzo leh thuamchak kawnga hlawhtlinna mellung pawimawh tak a ni.

☑ India Skills Northeast Regional Competition 2025-26 neih zawh takah Mizoram chu pakhatna a ni.

☑ Hei hian thiamthil leh theihna Mizoramin a neih tam zia leh hai chhuah hmabak pawh a la awm nual tih a tarlang.

☑ Sawhthing quality ṭha, leichi hmang lo deuh vek thar chhuah tam avang leh chin uar deuh deuh a nih avangtein nikum December thla khan NITI Aayog chuan Mizoram chu sawhthing khawpui 'Ginger Capital of India' atan a puang.

☑ Mizoram hian leichi tel lo buh leh thlai bakah ramhmul damdawi, thlai rimtui, mau, oil palm, rubber leh inghahna tlak dangte tam zawk thar thei turin theihna nasa tak a nei.

☑ Kumin National Voters' Day-ah khan Mamit district chuan India rama inthlanna kalpui ṭha ber lawmman 'Best Election District Award' a dawng.

☑ Hei hian mipui thlan rorelna tundin kawnga pawimawh tak inthlanna zalên, felfai, dik leh langtlang siam kawngah Mizoram chu nghet takin a ding tlat tih a tarlang.

☑ Aizawl International Half Marathon ṭum hnihna chu February 14, 2026 khan hlawhtling taka huaihawt niin, chhimtu ṭhahnem tak a nei.

☑ State ralmuang tak, mawi leh hnam ziarang hausa, khawtlang inlungrual, sik leh sa nuam, fai leh boruak thianghlim thlenga nei a nihna hi Mizoram thangmawina leh mite ngaihhlutna a ni.

☑ Traffic nun dan mawi tak leh horn pek lohna a ni te hi India ram pum ang pawha mite ngaihsan leh sawi zui nasat a ni.

☑ Heng kan hmingṭhatna leh vanneih biknate hi chhawmnung turin theihtawp chhuah zel ang u.

☑ Khawvel dinhmun inher danglam zel leh India ram Act East Policy kalpui mekah Mizoram hian dinhmun pawimawh tak a luah.