Dan hnuaia pawl inziak lut lote inziaklut tura hriattirna pe dawn

Siaha District Cooperative Development Committee chu nimin khan an chairman VL Hruaizela Khiangte, bawrhsap kaihhruaiin an ṭhukhawm a; Mizoram Cooperative Societies Act and Rules hnuaia pawl inziaklut lote chu inziak lut vek tura hriattirna lehkha pek an rel.

VL Hruaizela Khiangte chuan, pawl (society) din chu mipui harsatna sutkian leh an mamawh phuhruk sak bakah, pawlin hlêp tlemte an lo neih ve theihna a nih thu a sawi a, "Pawl din kan awlsam ang aiin thawhho kan thiam leh tlat ṭhin lo hi inenfiah kan ngaihna lai niin a lang. Kan tihluai a, mumal takin kan kal chho dawn ṭan tihah society tihchakna tur sum leh pai a lo awm a, mimal ta tur emaw tih mai a awl ṭhin," a ti a, hlawk nghal hluai tum loa nakin hun thlir chunga daihrei zir a ṭul thu a sawi.

Ṭhutkhawmah hian Mizoram Cooperative Societies Act and Rules hnuaia la inziak lut lo pawl ding zawng zawng chu inziak lut vek tura hriattirna lehkha pek an rel a; district tinah Multipurpose Primary Agriculture Credit Society 10 tal din belh tura ngenna lehkha an dawn chungchangah NABARD-in Siaha district enkawltu tur an dah hunah chak zawk bawhzui ni se, an ti.