Hulhliap SSC aṭanga chhuakte training thawh 4-na ṭan a ni

Sorkarin ruihhlo ngaite puala Hulhliap Short Stay Centre a buatsaih aṭanga chhuakte'n eizawnna mumal an neih theih nana a thlawna thiamthil zirtirna thawh lina (batch 4) chu nimin khan MFM Skill Training Centre, Dawrpui Vengtharah ṭan a ni a; batch 4-ah hian Hulhliap SSC aṭanga chhuak mi 23-in aluminium fabrication an zir dawn.

Training hawnna inkhawm hi Task Group on Aftercare, Skill Training & Handholding, Hulhliap SSC member secretary Vanlalhruaii'n a kaihruai a; train-ing hawngtu Young Women’s Christian Association president Lalhmingliani Hmar chuan mihring rilru put hmang zir zelin mihring an awm ṭhin tih a sawi a, "Kan rilru kan thunun a pawimawh," tiin, hlawhchham leh tlûk sualnate an nei a nih pawhin 'Ka ti thei a ni' tia mahni inhneh tura pen chhuak zel turin training turte a chah.

MFM executive director Lalramchhuan-zela chuan, "Pathianin mi ropui tak leh midangte tana luang chhuak thei turin min duang vek a, chu chu va tawng baw tur chuan kan thil tih kawng tinrengah taima taka thawk a, ṭhahnemngaihna leh rinawmna kan nunpui tlat chuan kan hnathawh kawng tinrengah malsawmna kan dawng ngei dawn a ni," a ti.

Hulhliap SSC aṭanga chhuakte tana thiam thil zirna hi batch thum kalpui tawh niin, mi 92-in trade hrang hrang - assistant electrician, aluminium fabrication leh food processing-te an zir chhuak tawh a ni.