State páwna Mizo zirlaite'n CAB an duh loh thu an puang

Shillong Mizo Students Union chuan Ningani khan thuchhuah siamin, CAB chu Parliament in pahnihin pawm tawh mah se, an pawm ngai dawn loh thu an tarlang a, "Theihtawpa kan lo do ve CAB 2019 chu Rajya Sabha-ah pass a ni ta hi kei ni MSU, Gen.Hqrs. Shillong chuan pawi kan ti hle. He Bill hi Mizoram tan hlauhawm lo eng ang mah se, Shillong MSU chuan India hmarchhak hnam tênaute tana a ṭhat loh avangin Rajya Sabha-in lo pass tawh mah se, a tàwp thleng leh a bâkah pawh kan pawm chuang lo ang," an ti.

Shillong MSU hian Shillong leh a chhehvela Mizo zirlai awmte hnenah thuchah siam nghalin, "Tun dinhmunah chuan Shillong MSU chuan Mizo zirlaite him leh thlamuang taka mahni ram ngei an thlen ṭheuh kan duhsak ber leh kan lungkham ber a ni rih," an ti a; Assam state chhung, a bikin Guwahati leh a chhehvela Mizo zirlai tangkhang mekte chu MSU hruaitute hnenah a rang lama inhriattir turin an ngen a ni. Guwahati Mizo Students' Union president chuan Vanglaini palai zawhna chhangin, CAB chu Guwahati MSU-in an duh loh thu a sawi.

Guwahati MSU hian nimin khan press release an siam a; "Ni 11.12.2019 (Nilaini)-a India Parliament-ah CAB pawm a ni ta hi Guwahati MSU chuan pawi a tiin a dem hle a. Kan Lok Sabha MP Pu C Lalrosanga’n he Bill pawm zawnga thu a sawi hi a lungchhiatthlak kan ti tak zet a ni," an ti a, CAB chuan Mizoram huam lo mah se, GMSU-in an dodal a, an pawm lo bur tih an tarlang. Mizo Students' Union, Bangalore chuan thuchhuah siamin, CAB chuan Mizoram leh India hmarchhak state ṭhenkhatte huam lo mah se, hun kal zel tur atan Mizote leh hmarchhak mite tana him lo turah an ngaih avangin CAB chu a tawp thlenga an thlàwp loh tur thu an puang.

Mizo Students' Union, Pune pawhin thuchhuah siamin, Parliament-a CAB pass a ni chu an dem thu an tarlang a, "Mizo Lok Sabha MP Pu Lalrosanga'n Bill ṭha lo tak a thlawp hi kan dem takzet a, hei hian Mizote leh hmarchhak mipuite rilru a tina a, a chet dan hi hnam phatsanna a ni," an ti. CAB chuan Mizoram huam rih lo mah se, an duh loh thu leh a dodalnaa hmalakna reng reng an thlàwp thu an puang a ni. CAB chungchangah hian Delhi Mizo Zirlai Pawl pawhin thuchhuah an lo siam tawh a; "Ni 9.12.2019 (Thawhṭanni)-a Lok Sabha-a CAB put luh a nih chungchanga sawizuinaa kan Lok Sabha MP zahawm tak Pu C. Lalrosanga’n Bill pawm zawnga thu a sawi hi keini DMZP chuan pawi kan ti em em a ni. DMZP chuan CAB hi Parliament-a put luh a nih hma aṭangin a dodal tawh a, Bill ennawn a nih hnuah Mizoram huam teltir lo mah se, engtik lai mahin he Bill hi kan pawm thei dawn lo a ni," 

tiin an tarlang.