Kan ram a dam lehna tur atan YMA kan chêt chhuah leh a ṭul - CYMA President

Central YMA president R Lalngheta chuan Mizoram a dam lehna atan YMA an chêt chhuah leh a ṭul thu a sawi.

Ramthar Veng Branch YMA-in February 27, 2026 zana YMA Kumpuan hawn inkhawm an buatsaih a hmanpuinaah thu sawiin CYMA President chuan, "Heti taka kan ṭhalaite min sawisak saktu ruihhlo leh a rawn la luttu te, helaia zuartute hi enliam mai theih an ni ta lo. Kan ram a dam leh nan heng ho do tur hian YMA kan chet chhuah a lo ṭul leh ta. Heng kan dote do hneh tur hian YMA member-ten theihtawp kan chhuah a, kan ṭanrual a ngai tak zet a ni," a ti.

R Lalngheta chuan YMA chu Pathianin a hruai zel thu sawiin, "Thawhhona ṭha kan neih a, kan ram ṭhatna atana lungrual taka kan thawhho zel phawt chuan Pathian hian mal min sawmin, kan hma min hruaisak zel ang," a ti a, an beisei phak loh ruihhlo dona atana an mamawh em em motor eng emaw zat pawh Ambani -te hnen aṭangin an dawn thu a sawi.

Tih takzeta an beih chuan ruihhlo ngaite chu an chhanchhuah theih thu sawiin R Lalngheta chuan, "Tam tak chu YMA-ten an man, home-ahte an dah a, councelling an pek te hi an ṭha chhuak tawh a ni. Chuvang chuan hengho chhanchhuak tur hian hmangaihna leh dawhtheihna nen theihtawp kan chhuah hi a ṭul a, a la ti loten an tih ve chhin lohna atana venghim tura theihtawp kan chhuah a ṭul a ni," a ti bawk.