Aizawlah CAB duh lo thalai rual an pungkhawm

Citizenship Amendment Bill, 2019 (CAB) duh lo zirlai rual, social media hmanga inhûi khawm, 'Zoram Revolution Movement' (ZRM)-te chuan nimin khan Vanapa Hall kawtah CAB duh lohna lantirin, sit-in demonstration an huaihawt.

ZRM-te hi a tirah chuan MNF pisa Mizo Hnam Rûn kawtah CAB duh lohna thuziak kengin an ding a, police-te'n mi 53 chu Aizawl SP office-ah an hruai lui a ni. Police-te chuan, MNF lam nena boruak ṭha lo zawk a awm an hlauh vanga hruai an nih thu an sawi. Hun eng emaw chen Aizawl SP pisaa awmtir an nih hnuah thubuai siamsak loin chhuah leh an ni.

ZRM-te chuan buaina siam tum an nih loh thu sawiin, "Sorkar lai pisa kawta lungawi lohna lantir ṭha bera kan hriat avangin kan ti a ni. Engmah buaina kan siam lo a, kan au bengchheng lo a, chutih laia MNF-te'n min khawih kha ná kan ti khawp mai. Kan legal adviser-te kan ráwn ang a, a ṭul chuan FIR kan thehlut ang," an ti.

ZRM-te chuan, CAB-in Mizoram a huam leh huam lohah an buai loh thu sawiin, "Kan secularism te, kan pluralism an khawih chingpen te, India danpui an pawisa lote hi kan duh lo. Mizoram huam lo mah se, India ram hmun hrang hranga Mizote kan thlahthlam thei lo," an ti a; ZRM chu political party leh NGO hnuaia awm lo, hruaitu bik pawh awm lo, CAB duh lotu an nih thu an sawi. ZRM-te hian Vanapa Hall kawtah police venhimna hnuaiah lungawi lohna hi an lantir zui a, C Lalrosanga báng tura an duh thute leh CAA an duh loh thute an au chhuahpui. An banner tar zingah 'We Stand with All Anti CAB Protester' tih leh 'State Danga Mizo Mipui In Thil Tihsual Rah Tuartute Hi Ngaihsak Vat Rawh U' tihte a tel.