KHAWTHLIR

Durtlang Higher Secondary School NSS unit chuan nimin khan Synod Hospital Blood Bank-ah kalin thisen unit 17 an pe a, petute mipa 16 leh hmeichhia pakhat an ni.

Mizoram Consumer Union (MCU) chuan December 12, Ningani khan Agriculture conference hall-ah Annual General Meeting an hmang a, FCSCA minister K Lalrinliana'n a hmanpui. Minister chuan, mipui dikna chanvo humhalh turin theihtawp chhuah a ngaih thu a sawi. Meeting-ah hian LPG home delivery leh online refill booking a rang lamin Mizoram pumah hman ni rawh se, an ti a; oil leh gas hnianghnara kan neih theih nan oil company tam zawk chah chhuah ni rawh se, an ti bawk.

Aizawl District Magistrate chuan nimin khan thupek chhuahin, Vijay Diwas leh Wreath Laying Ceremony chu December 16, Thawhṭanniah War Memorial, Treasury Square-ah hman a nih dawn avangin, Aizawl Dakinpui leh Raj Bhavan hmar lam gate inkarah December 16 hian mi panga aia tam punkhawm leh thil zawrh khap a nih thu a puang.

MPC party leh PRISM party hruaitute December 12, Ningania MPC pisa ṭhukhawm chuan, kum 2020-a Mizoram pum (district council tih loh zawng)-a village council, local council leh Aizawl Municipal Corporation inthlanah symbol pakhat hmanga inthlanna hmachhawn an rêl. MPC leh PRISM meeting hi MPC vice president Thangluaia'n a kaihruai a ni.

Union of Evangelical Students of India (Mizoram) chuan December 4-12, 2019 chhung khan Higher and Technical Institute, Mizoram (HATIM), Lungleiah 4th State Leadership Training Camp, 2019 an buatsaih a, Mizorama district pasarih aṭangin college leh higher secondary school-a Evangelical Union unit 18 an tel a, an vaiin mi 77 an lut. Camp-ah hian speaker chu UESI staff worker PM Phillip a ni.