Lirthei tlan dan leh hûn dan sawiho

February 19, Ningani khahn Lunglei Municipal Council (LMC) hnuaia Traffic and Transport Co-Ordination Committee (TTCC) chu an chairman K Lalrinawma, LMC vice chairman LMC BoC meeting hall-ah an ṭhukhawm a, Lunglei khawpui chhunga lirthei tlan dan leh hûn dan kaihhnawiha lehkha lut hrang hrang an sawiho.

TTCC ṭhukhawm chuan Lunglei khawpui chhung Serkawn leh 3 Gate inkar kawngpui sira side drain khuhna kawngpui zawl aia sanga awm chu lirthei hûnna atana hman ṭangkai a nih theih nan a san zawng siamṭhat a ṭul tiin, Lungleia MLA-te, LMC councillor-te leh local council hrang hrangte hnenah thlen a, siamṭhat theih dan tur zawn ni se, an ti.

Lunglei khawpuia BSNL telephone ban eng emaw zat chuan kawngpui a tihchep avangin leh telephone ban kawngpui lama awn, kawng tichep leh lirthei hunna tibuai theite chu siamṭhat a ṭul avangin BSNL hotute hnenah hemi chungchang hi thlen an rawt.

Khawpui chhunga motor workshop hrang hrangah lirthei an siam turte kawngpui kam, parking area tibuai zawnga dah an awm ṭhin avangin lirthei hun dan leh tlan dan chung­changah buaina a thlen ṭhin thu tarlan niin, LMC enforcement staff, traffic police leh local council hrang hrangte'n hma lain, enfiah se tih a ni.

Kawngpui kama in sa leh dawrkai ṭhenkhatte'n kawng sir ei hêka step leh kailawn an siam avanga lirthei dahna tur tihbuai leh kawng tihchep a awm theih avangin leh, an ram chin ni lo an hauh zui zel theih avangin enfiah ṭul tih niin, hmala turin LMC CEO an ruat.