MP aia demawm zawk chu MNF an ni - Lalduhoma

Zoram Peoples Movement (ZPM) chuan nimin khan kum 2019 chhung atan an pisa khârna inkhawm an buatsaih a, MLA Lalduhoma’n thu sawiin, “CAB chungchangah lawmna tur a awm lo. Exemption tal min pe se tih hi chauhthubarawh thil chauh a ni. MNF MP hi tu pawh ni se, CAB hi an vote tho ang. MP aia demawm zawk chu MNF party hi a ni,’’ a ti.

Lalduhoma chuan, chief minister Zoramthanga chu Mizo mipui bumah puhin, “MNF Aizawl South-III Block-in January 24, 2019-ah Aibawkah sorkar thar an lawmnaah Chief Minister hian, CAB hi pass a nih chuan NDA aṭanga inhnuhdawh an hreh loh tur thu a sawi,” a ti a; minister R Lalzirliana leh R Lalthangliana ten CM thusawi chungchang chu an sawi chhâwn tawh bawk thu leh CM Zoramthanga chuan a thusawi zawng zawngte a phatsan thu a sawi.

Parliament-ah party tênau tan thusawina hun chan a har thu Lalduhoma chuan sawiin, “Kan MP erawh chu thusawina hun ṭha tak pek a ni tlat mai. BJP an thláwp chauh ni loin, hmathehah leh hawlfungah, an hmanruaah duh duhin an hmang ta leh zel mai hi chu a zahthlak hle a ni,” a ti.

Lalduhoma chuan, CAB-in dan loa India rama lutte hnenah khua leh tui nihna pein, “December 2014 hma lama lo lut rûte kha khua leh tui nihna pek an ni dawn a, document tel loa lo lut ru an nih avangin, nimin lawka lo lutte pawhin kum tam tak lo awm tawh angin an inchhál thei dawn. Lo lut tharte pawh awlsam takin CAB hmanna hmunah khua leh tui an ni thei tawh dawn a, chumi hnuah Mizoramah lo luh an tum ngei dawn a ni,” a ti a; CAB-in Mizoram a huam loh vanga lawmna tur a awm loh thu a sawi.

Checkgate paltlang loa Mizoram luhna tam tak a awm thu sawiin Duhoma chuan, “Kumin January-October chhung khan MNF sorkarin mi 1,50,641 hnenah ILP an pe hman a, an pek tawhsate leh permit nei loa lo lutte nen chuan mi nuai thum vel lai an tling ang. Bairabi-ah endik mumal lohin ni tin an lo lut reng a ni,” a ti. CAB-in a huam loh hmun sawifiah nan ILP chungchang tarlan a nih thu sawiin, “A huam ve dawn loh thu tarlanna ringawt a ni. Ṭhenkhatin he Bill avang hian ILP a nghet ta sawt anga an sawi hi dâwt muhlûm a ni,” a ti bawk.

Lalduhoma chuan, CAB dodal kawngah zirlaite hmalakna chhuanawm a tih thu sawiin, “Kan thláwp tlat a, khualzin tangkhang leh mangangte tana an hmalaknate pawh fak tlak a ni. CAB hmanga India hmarchhak mipuite inpumkhatna tihchhiat tuma beih kan nih laia zirlaite hmalakna hi a ropui kan ti,” a ti a; tun hnu zelah pawh hmarchhaka chengte inlungrualna vawng nung zel turin Mizo mipui a sáwm a ni.

Inkhawmah hian ZPM president Lalliansawta pawhin thu sawiin, Krismas leh kumthar hlim taka hmang ṭheuh turin member-te duhsakna a hlân a, “Kan ram dinhmun kan hre ṭheuh a, kan ram leilung kan humhalh zo lo a, foreigner kan dang thei hek lo. A chhungah keimahni ngei khawtlang nun ṭha lo pui puiin min chîm mek karah hian Pathian ráwn chungin chak takin i pên ang u. A pawimawh ber chu - thiltihtheihna, chakna leh ropuina pe theitu, thuneihna sangber neitu kan Pathian lamah i ṭang tlat mai ang u,” a ti.

Lalliansawta chuan, ZPM thlàwp MLA pasarihte House chhungah chhuanawm takin an che ṭhin tih sawiin, lawmawm a tih thu a sawi bawk. ZPM pisa khar inkhawm hi ZPM treasurer C Lalṭanpuia’n a kaihruai a, January 20, 2020-ah hawn leh a ni ang.