KHAWTHLIR

Link road laihna

Assembly Session-ah MNF member Prova Chakma zawhna chhangin Agriculture minister PC Vanlalruata chuan, kum 2025-2026 chhungin agriculture link road laihna atan NABARD aṭangin cheng vbc 49.18, SASCI aṭangin cheng vbc 2.70 leh NMEO-OP aṭangin cheng vbc 7.343, a vaiin cheng vbc 59.22 hmuh a nih thu House a hrilh.

Dan zirtir

Mizoram State Legal Services Authority bultumin February 19, Ningani khan Govt. T Romana College-ah zirlaite tan dan leh hrai chungchang inzirtirna hun buatsaih a ni a, advocate Lalfamkimi'n zirlaite hi POCSO Act leh BNS chungchang a zirtir a ni.

Khauh zawka FMR kenkawh rel a ni

February 19, Ningani khan Lawngtlai leh Siaha district chhunga dan loa lut leh trading market chungchang Lawngtlai leh Siaha district-a thuneitute'n video conferencing hmangin an sawiho a, Free Movement Regime (FMR) chu khauh zawkin district magistrate pahnihten kenkawh leh surprise checking of illegal immigrants (undocumented) neih an rel.

MUP inkhawmpui

Thenzawl Area MUP chuan nimin khan Thenzawl Field Veng Presbyterian Kohhran Hall-ah inkhawmpui an hmang a, MUP Gen. Hqrs president Nghaklianmawia'n a hmanpui. Rorel inkhawmah sorkar Civil Sub-Division awmna khuaah sub-hqrs MUP din rawtna te, tar pension chungchangte leh area MUP hmalakna tur hrang hrangte an ngaihtuah. Thenzawl Area MUP hnuaiah hian khaw panga aṭangin member 968 an awm a, chu'ng zinga 90 chu kum 90 chin chunglam an ni.

Material component

INC member C Ngunlianchunga zawhna ziaka chhangin Rural Development minister Prof Lalnilawma chuan, MNREGA hnuaiah kum 2025-2026 a labour budget approved aṭang chuan material component-ah Mizoram hmuh tur chu cheng nuai 29,505 a nih thu tarlangin, "Cheng nuai 8,459.91 hmuh a ni tawh," a ti.