District-ah State Day of Prayer hman a ni

Mizoramin state nihna a neihna ni State Day puala ṭawngṭai rualna (State Day of Prayer) chu nimin khan district khawpui hrang hrangah pawh hman a ni a; kumin State Day of Prayer thupui atan 'I dinthar leh ang u' Nehemia 2:17 tih hman niin, thupui hrang hrang thlansa hmangin an ṭawngṭai rual a ni.

Champhaiah chuan State Day of Prayer hi New Champhai Field-ah hman a ni a; additional DC James Lalnithanga'n a hmanpui a, Champhai district-a sorkar hnathawk zawng zawngten rinawm leh dik taka mipui tan hna an thawh theih nan ṭawngṭaipui turin kalkhawmte a sawm.

Kolasibah chuan bawrhsap Robert C Lalhmangaiha kaihhruaiin DC pisa tualzawlah hman a ni a; Kolasib khawpui huam chhunga Kohhran hrang hrang hruaitute leh mipui ṭhahnem tak an tel a ni.

Khawzawlah chuan State Day of Prayer hi Sub Hqrs. YMA Field-ah hman a ni a; bawrhsap K Vanlalṭhiana'n hmanpuiin, Khawzawla Kohhran, NGO leh political party hrang hrang hruitute leh member-te an tel.

Hnahthialah chuan SDC R Vanlalruata hoin State Day of Prayer hi BCM Biak-in Bazar-ah hman a ni a; chawng hniha hun hman niin, ṭawngṭai hona hun ṭum li hman a ni.