Minister hoin IWD hman dan tur rel

Social Welfare, Women & Child Development minister Lalrinpuii kaihhruaiin February 19, Ningani khan March 8, 2026-a International Women’s Day (IWD), 2026 lo thleng tur lawm dan tur rel a ni a; kumin IWD, 2026 thupui chu ‘Give to Gain’ (Pekin lukhawng a nei) tih a ni.

Ṭhutkhawmah hian Mizorama hmeichhe pawl hrang hrang bakah, Kohhran hmeichhe aiawhte leh Social Welfare, Women & Child Development department official-te an tel. March 8 hi Pathianni a nih avangin IWD 2026 lawmna hi March 18, 2026-ah Dawrpui Multipurpose Hall-ah buatsaih ni se, an ti a; IWD lawm dan tur programme duansa thlirho a nih bakah, IWD, 2026 thupui ‘Give to Gain’ (Pekin lukhawng a nei) tihhlawhtlin nana hmalak dan turte an sawiho a ni.

Hmeichhe pawl hrang hrangten hmalak ṭheuh ni se, an ti a; IWD denchhena hmalak dan tur rawtna an neih zingah ṭhenawmte bai insuah te, hmeichhe sumdawngten IWD puala discount neih te, mahni thiam dan leh remchan dan ang anga mahni aia khawsak hniamte ṭanpui leh March 8-ah hian YMA leh Kohhran chanchinbuahte thuchhuah siamte a ni.

Lalrinpuii chuan, Mizorama hmeichhia chan chhe zawk leh harsatna tuarte theih ang anga ṭanpui leh khaichhuah tum ṭheuh tur leh IWD 2026-ah hian mahni theihna zawn ṭheuha hmalakna nei ṭheuh turin kalkhawmte hi a chah bawk.