Aizawla College zirlaite'n CAB duh lo

Aizawla college hrang hrang inzawmkhawm, Aizawl City College Joint Students’ Union (ACCJSU) chuan nimin khan thuchhuah siamin, Mizo zirlai state páwna awmte’n Citizenship Amendment Bill, 2019 pass a nih avangin harsatna an tâwk tih an tarlang a; Mizo zirlai, haw thei loa awm mekte an haw hma chuan Mizoram leilung rap bik lo turin Lok Sabha MP C Lalrosanga an chah.

Mizoram Lok Sabha MP-in CAB a thlàwp avangin Mizo zirlaite leh eizawnna leh chhan hrang hrang vanga hmarchhak state hrang hranga awm mekte’n harsatna nasa tak an tâwk tih sawiin ACCJSU chuan, “Thlabár takin an awm mek a, Mizorama rawn haw thei loin an tangkhang mek a ni. Kan hnampui leh kan zirlaipui haw thei loa awm mekte’n Mizoram an rawn haw hma chuan kan MP Pu C Lalrosanga hi Mizoram rawn rap lo turin kan ngen a ni,” an ti.

ACCJSU chuan, “CAB 2019 hi ACCJSU chuan a tàwp thlengin a dodal zel dawn a, MZP hmalakna reng reng CAB emaw, sakhuana leh hnam himna thil reng rengah kan thláwp tlat zel dawn a ni,” an ti a; Lok Sabha leh Rajya Sabha-ah CAB pawm a ni ta chu pawi an tih thu an tarlang.

CAB chu India rama, hnam leh sakhaw tlem zawkte tichhe theitu leh awlsam taka chîmral theihna hmanrua a nih thu sawiin ACCJSU chuan, “Mizoram chu CAB lakah him tawh mah ila, kan ṭhenawm state tam zawkte a huam si avangin Mizoram tan a him tâwk loah kan ngai,” an ti a; Mizoramin Lok Sabha MP a neihchhunin CAB thlâwp zawnga vote a pe chu hriatthiam har an tih thu leh, amah thlangtu mipui zahlohnaa an ngaih thu an sawi.