Dy.CM-in tuizem lian 30 a hawng

SIPMIU-in North East Capital Cities Development Implementation Programme (NERCCDIP) hnuaia Aizawl veng hrang hranga tuizém lian (water reservoir) 30 an siamte chu Deputy chief minister Tawnluia, Urban Development & Poverty Alleviation department enkawltu chuan nimin khan a hawng.

Tuizém hawnna inkhawm hi Dy. CM pisaah neih a ni a, UDPA secretary Dr C Vanlalramsanga’n a kaihruai. SIPMIU project director Lalrothanga’n tuizem lian 30 siamnaa SIPMIU hnathawh dante a sawi a; PHE engineer-in-chief Lalmuanzova’n tuizem lian hman dan turte a sawi thung.

Tawnluia chuan, sorkar laipuiin Asian Development Bank (ADB) nena ṭang dunin hmarchhak state khawpui panga - Aizawl, Agartala, Kohima, Gangtok leh Shillong-ah khawpui tihchangtlun nan NERCCDIP a kalpui tih sawiin, “He programme-in a tum ber chu, khawpuiah tui hnianghnâr taka pek chhuah te, êk leh thli sawngbawl te, khawpui faina leh thianghlimnaah leh bawlhhlawh sawngbawl kawngah infrastructure din leh tihhmasawn te, inzirtirna kalpuite leh thuam ṭhatte a ni,” a ti.

NERCCDIP hi chhawng (tranche) thuma kalpui a ni a, a vaiin cheng vbc. 21 vel sên a ni. Tranche-I hnuaiah tui-zem lian hlui tawh pasarih - Seventhday Tlang, Bawngkawn, Tlangnuam, Zemabawk, Govt. Complex, Armed Veng leh Mission Vengthlanga mite sak ṭhat leh chowkidar quarters hmun pathumah leh site office hmun thumah sak belh a ni a; April 25, 2010-ah ṭanin, April 2012-ah an zo a, sum sen zawng zawng chu Rs. 5,11,69,247 a ni.

Tranche-II hnuaiah Hlimena PHE tuizem lian hlui tawh pakhat sak ṭhat a nih bakah, Mualpui leh Tanhrilah tuizem lian thar sak a ni a; June 25, 2012-ah ṭanin, January 18, 2014-ah an zo a, Rs. 2,71,89,548 hman a ni. Tranche-III ah chuan tuizem lian thar pakua sak a nih bakah, ruahtui dah khawlna tur tuizem 11 sak thar a ni a, hmun parukah site office sak a ni bawk. Tranche-III ah hian May 9, 2016-ah hna thawh ṭan niin, November 8, 2018-ah zawh a ni a, sum sen zawng zawng chu Rs. 13,20,93,854 a tling.