Larsapin State Games khârna a hmanpui

Mizoram State Games vawi hnihna chu nimin khan Lammualah khâr a ni a, khârna inkhawmah hian Governor PS Sreedharan Pillai chu khuallian a ni. He intihsiaknaah hian a pumpuiah Aizawl East-I bial an sang ber.

Governor chuan, Mizoram State Games vawi hnihna leh Mizoram state a nih hnua a vawi khatna hlawhtling taka huaihawt a ni chu thil chhinchhiah tlak a nih thu sawiin, MLA 40-te’n phûr taka an bialte an buaipui chu thil danglam 

leh state dang tana entawn tlak a nih thu a sawi.

PS Sreedharan Pillai chuan, Mizo infiammite’n Mizoram mai bakah, India ram an tihmingṭha ṭhin tih sawiin, “Jeje Lalpekhlua India team captain leh inghahna a ni a, Indian women hockey team player Lalremsiami’n Asian Games 2018-ah silver medal a lak bakah IHF Rising Star of the Year zinga a chhawpchhuah a ni. Rit chawi chak Jeremy Lalrinnunga, India ram aiawha Youth Olympics 2018-a gold medal la hmasa ber a ni. Heng mite hi kan superstar an ni mai lo a, India chhuanvawrte an ni a, ka chhuang tak zet a ni,” a ti.

Chief minister Zoramthanga chuan, kum 34 hnuah State Games neih a ni leh thei chu lawmawm a tih thu sawiin, Mizoramin infiamna lamah India ram leh khawvel huap thlenga lang phâk turin State Games chu tihhmasawn zel a nih tur thu a sawi. Sports minister Robert Romawia Royte pawhin thu sawiin, State Games a hlawhtlin theihna tura che vel zawng zawngte chungah lawmthu a sawi a; State Games chhungin talent nei ṭha tak tak mi tam tak hmuh chhuah a nih thu sawiin, “A pawimawh lai chu infiammite leh ṭhalaite tan ruihhlo laka inthiar fihlim a ni. Hrisel a pawimawh a, hriselna tel lo chuan ramin hma a sawn thei lo a, Mizoram hi India rama state hrisel ber nih kan tum a ni,” a ti.

Mizoram State Games 2019-ah hian infiammi 7,447 an tel a, infiamna chi hrang 32 awmin, hmun 24-ah inkhelh a ni a; Assembly constituency 40 zingah gold medal 25, silver 18 leh bronze 16 latu Aizawl East-I an champion. Pahnihna Aizawl West-I bialin gold 21, silver 10 leh bronze 18 an la a; pathumna Aizawl East-II bialin gold 17, silver 11 leh bronze 23 an la a ni.