Women Police Station hmasa ber hawng

Nimin khan Aizawl Police Station-ah hmeichhia leh naupang, hleilenna tuarte’n thlamuang leh ngaihngam taka an tlûk luhna tur, hmeichhe hlang awmna police station hmasa ber ‘All Women Police Station, Aizawl District’ chu Home minister Lalchamliana’n a hawng a; Mizoram Safety App leh Traffic e-Challan System a tlangzarh bawk.

All Women PS hi Investigative Unit of Crime Againsts Women (IUCAW) hnuaia hmeichhe hlang police awmna station a ni dawn a, Aizawl PS-ah din a ni. Thawktu zawng zawng hmeichhia vek niin, hmeichhia leh naupang laka hleilenna thubuai an khawih dawn a, thubuai ziah luh leh chhuizui kawngah hna a awlsam phah an beisei thu Mizoram police hotute chuan an sawi.

Mizoram Safety App hi Android application a ni a, Google Playstore aṭangin download theih tura dah a ni. Apps hi Mizoram police leh ICT department-te ṭangkawp siam a ni a, mipuiin rang taka police station an biak pawh zung zung theihna tura duan a ni. Dan bawhchhiatna leh rîkrum thilah mipui leh police-te awlsam taka biakpawh zung zung theihna tur a nih beisei a ni bawk.

Traffic e-Challan system pawh Android application leh internet hmanga him leh awlsam taka Traffic Enforcement System hman theihna tura siam niin, e-Transport MMP hnuai duan a ni a, dan bawhchhiatna leh pawisa chawi chungchang en zuina tur a ni. VAHAN leh Sarathi-te nen pawh ṭangkawp tura duan a ni a; dan bawhchhiatna hmuna pawisa inchawitir theihna tur leh dan dik loa pawsa inchawitir venna tur a nih thu police hotute chuan an sawi.