Congress aia mi dangte tana malsawmna thlen nasa party an awm lo - Lal Thanhawla

Mizoram Pradesh Congress Committee (MPCC) president Lal Thanhawla chuan, Congress party aia mi dangte tana malsawmna thlen nasa political party an awm lo niin a sawi.

Kum 2019 atana Congress Bhavan khârna inkhawm, nimina neihah thu sawiin Lal Thanhawla chuan, “He ram tana rotling leh chhuanawm zawng zawng hi Congress kuthnu deuh vek a ni. Bairabi rél kawng Sairang thlenga siam mek te, Bangladesh leh Burma border trade te, Kaladan Multi Modal Transit Transport Project leh a dang tam takte hi Congress sorkar laia mi vek a ni,” a ti.

Mizoram chu chîmral hlauhawm tak dinhmuna ding a nih thu sawiin Hawla chuan, “Khawvela sakhaw lian pathum - Mosolman, Hindu leh  Buddhist-te’n a hual vel rama cheng kan ni a, awlsam taka chîmral mai theih kan ni. Chanchin ṭha hrilna kawnga theihtawp kan chhuah zel chuan Pathian hian min raltir mai lo ang tih beiseina erawh ka nei,” a ti a; Mizote chu hnam tlem ni mah se, khawvelah chanchin ṭha hril nasa ber an nih a rin thu a sawi.

MPCC President chuan Citizenship Amendment Bill 2019 chu Narendra Modi leh Amit Shah ten Hindu ram siam an tumna a nih thu sawiin, “Manifesto-ah pawh an dah thlap a ni. Ṭhenawm ram zingah eng vangin nge Burma an tihtel loh kan tih chuan, Hindu an awm ve loh vang a ni. Heta ṭang ringawt pawh hian an thil tum a chiang hle,” a ti.

Union Home minister Amit Shah-a’n kum 2020 aṭangin Uniform Civil Code (UCC) hman a nih tur thu a sawi tih sawiin Lal Thanhawla chuan, “India ram pum hi Hindu sakhua mila min hruai a, kan sakhua leh hnam nun thlenga min thlaksak an tum a, hei hi hnam leh sakhua tana thil pawi vàwrtawp a nih dawn avangin nasa lehzuala kan do a ngai dawn a ni,” a ti a; kohhranin a dodal CAB pass a ni leh MNF-in an thláwp chu a vanduaithlak tak zet tih a sawi.

Lal Thanhawla chuan, Kristiante tan ṭawngṭaina chu ralthuam ṭha ber a nih thu sawiin, Mizo hnam leh sakhua a ral loh nan kohhran leh mimal anga ṭawngṭai zel turin mipui a sáwm a; Krismas leh kumthar dam tak leh hlim taka hmang turin Mizoram mipui duhsakna a hlân a ni.