Dila tla hlum naupang 3 vui an ni

Thenzawl naupang pathum, February 21, Inrinni tlaia dila tla hlumte chu nimin chhun dar 12 khan an chenna inah ṭheuh vui an ni.

Thenzawl aṭanga thu dawn danin, Thenzawl Vengthara mipa naupang pathum - H Lalhriattluanga (9) s/o H Laldawngliana, Lalmuansanga (9) s/o Lalthangpuia (L) leh C Lalbiakhlua (7) s/o Lalfakzualte chu Thenzawla mimal dil enkawlah an tla hlum a ni.

Naupangte hi Inrinni khan an ṭhianhoin an lêng chhuak a, zanriah ei hunah pawh an haw loh avangin an chhungte'n an ngaihven a ni. An ṭhianpa pakhat chu an inah a haw a, a ṭhiante chanchin an zawt a, dila an kal thuin a chhâng. Dil chhehvelah zawn nghal an ni a, dil kamah an silipar hmuh a nih avangin dil chhung chu an dap zui a ni.

Naupang pathumte chu dilah hmuh an ni a, tlai dar 5:30 leh dar 6:00 inkarah lak chhuah kim an ni. An ruang chu Thenzawl Vengthar Branch YMA President inah lak phawt a ni a, Inrinni zanah Bengkhuaia Hall-ah lumen niin, nimin chhun dar 12 khan an in ṭheuhah vui an ni.