Chetsualnaah mi pahnih an thi

Francis Lalruatfela (36) h/o Caroline Saidingpuii Sailo, Tlangnuam Veng chu scooty (scooter)-a chetsualna vangin February 21, Inrinni zan dar 7:15 khan a thi a; nimin chawhma dar 11 vel khan Lalchungnunga (26), Zemabawk East chu bike-a a chetsual avangin a thi bawk.

Thu dawn danin, Francis Lalruatfela hian a ṭhianpa nen February 14, 2026 khan Serchhip aṭangin scooter-in Aizawl an pan a, kawng lakah scooter aṭangin a tla a, Thingsulthliah PHC-ah enkawl a ni. February 15 khan Ebenezer Medical Center panpui a ni a, a hliam a tuar loin February 21, Inrinni zan khan a thi a ni.

Nimin chawhma dar 11 vel khan Lalchungnunga (26) s/o R Vanlalruata, Zemabawk East chu bike-a a chetsual avangin a thi. Thu dawn danin, Lalchungnunga hian bike khalhin, mi pahnih a phur a, Zemabawk North kawngpuia an tlan laiin Ṭhuampui lam pana tlan truck hnuaiah bike-in an tleng lut a ni.

Lalchungnunga hi damdawi-in panpui a nih hnu darkar chanve velah a hliam tuar loin a thi. Bike hnunga chuang pakhat chu a malpui ruh a tliak a, pakhat zawng chu a per chhuak thung a; damdawi-inah enkawl an ni.