MLA-te'n Lungleia kawng siam an tlawh
Lunglei West bialtu MLA T Lalhlimpuia leh Lunglei South bialtu MLA Lalramliana Papuia te chuan tun hnai khan Lunglei khawpuia kawngpui siam mekte an tlawh a; lirthei tlân chak lutuk tur venna atana speed breaker siam chu danin a phal loh avangin, speed breaker siam tura nawr lo turin mipui an ngen.
MLA pahnih hi Lunglei Municipal Council (LMC) vice chairman K Lalrinawma bakah, PWD Lunglei Road Division-I hotute'n an ṭawiawm a; hnathawh tawh chin an en a, hmabak leh hmachhawpte leh harsatna awm thei hrang hrang pumpelh leh chinfel dan turte an sawiho nghal.
Lirthei tlân chak lutuk tur venna atana kawng chhùn pàwn (speed breaker) siam chu NH inkaihhruaina dan (NH Norms)-in a phal loh thu sawiin MLA-te chuan, Lungleia kawngpui siam mekah speed breaker siam tura hna thawktute nawr lo tur leh, mahni thua siam ringawt lo turin khawtlang hruaitute leh mipui an ngen a ni.
T Lalhlimpuia chuan, Lunglei khawpui chhung kawngpui siam mek chu fûr hmaa zo hman ngei tur leh Aizawl-Thenzawl-Lunglei (ATL) kawng siamtute pawh chak tak leh ṭha taka hna thawk turin a chah a; Lunglei mipuite chu traffic chungchangah hna thawktute thu zâwm a, hnathawktute harsatna thlen lo tura ngenin, kawng ṭha a awm theih nan Lunglei mipuite'n kawng siamtute an ṭawiawm ṭhat a ṭul thu a sawi.
Lunglei khawpui chhung kawngpuite ih February 19, 2026 khan siam ṭan a ni a; AOC - Pukpui Manguri Petrol Pump chhak thleng, km 12-a thui siam tur a ni a, ATL kawng siam mek nen a inzawm dawn. Dense bituminous macadam (DBM) milimetre 50-a chhah chungah bituminous concrete (BC) mm 30-a chhaha phah hnan tur a ni a; Lunglei AOC - Lunglei Chanmaria Samson-a in zawn thleng DBM phah a ni tawh.
AOC-Pukpui inkar kawngpui (main road) siamṭhat a nih dawn bakah, veng chhung inkal pawhna kawngte pawh paver finisher len theihna chin chu cheng vbc 5 bawr vela siamṭhat tura ruahman a ni a; veng chhung inkal pawhna kawng siam tur chin thliar mek a ni.
MLA-te leh PWD hotute hian leimin vanga Theiriat kawng chunga PWD kawng tlabal an en nghal a ni.