Police leh AR-in hmun hrang hrangah methamphetamine leh heroin an man

Mizoram Police leh Assam Rifles te chuan February 20-22, 2026 chhung khan hmun eng emaw zatah ruihhlo - heroin leh methamphetamine eng emaw zat an man.

Assam Rifles chuan February 20 khan Kakichhuah, Lawngtlai district-ah lawnglêng hmanga Myanmar aṭanga Mizoram rawn lut mi pali hnen aṭangin methamphetamine (meth) kg 3.952 an man. Meth kengtu Lairamliana (40) s/o J Dangia, Bungtlang nia inchhal leh a thurualpui Myanmar mi pathum kum tling lo vekte man tel an ni.

February 20 vek khan zing dar 8 khan Zokhawthar Police-te chuan patrolling an neihnaah ramria Maruti Ecco van MZ-01 H-7874 chu ringhlelin an endik a, crystal methamphetamine kg 10.25 leh heroin gram 145 an man.

Lirthei khalhtu Zaena (52) s/o Lungmuana, Lamzang, Myanmar tuna Khawmawi, Myanmar-a cheng mek nia inchhal pawh man nghal a ni a, thubuai siamsak a ni.

Zokhawthar Police leh Assam Rifles ṭang dun chuan February 21, Inrinni khan joint operation an nei a, Kenbo bike, Lalramliana, Myanmar nia inchhalin Kenbo bike-a a phurh methamphetamine kg 15.91 an man. Lalramliana leh meth hi Zokhawthar Police-te'n an kawl a, chhui zui turin thubuai an ziak lut.

February 21 vek khan Champhai Khankawn Police checkgate-a duty-te chuan Champhai leh Aizawl inkara tlan ṭhin maxicab MZ-01 N-3822 an dapnaah passenger pakhat Lalhruaizela (22) s/o Zaliansanga, Champhai Kanan Veng nia inchhal hnen aṭangin heroin hram 46 an man.

Mizoram Police-a Lunglei District Special Branch mite leh Assam Rifles mite chuan Aizawl-Champhai maxicab service MZ-01 N-3822 aṭangin heroin gram 94.42 an man. Maxicab hi Lalhmangaihzuala (34), Champhai Dinthar Veng khalh a ni a; driver bakah Lalṭanpuii (24), Champhai Zotlang, Lalthanpuii (38), Lunglei Farm Veng leh Ruthi Sangziki (42), Lunglei Ramthar te chu man an ni.