ZPM Ṭhalaite'n kawng siam an tlawh

ZPM Ṭhalai Gen. Hqrs president Jeje Lalpekhua, MLA leh hruaitu dangte chuan February 21, Inrinni khan NH-6 Sairang leh Buichali inkar kawng thawm ṭhat mek a hmunah an en a; Sairang-Buichali khawihtu J Infratech Pvt Ltd project coordinator Amit Singh leh a thawhpuite'n an lo dawngsawng.

NH-6 chu ZPM kaihhruai sorkarin a ngai pawimawh thu tarlangin ZPM Ṭhalai chuan, "Thawm ṭhat hna theihtawpa thawh mek chu chak zawk leh ṭha taka thawh a nih theih nan kan vil reng a, khawpui chhunga kawng siamte pawh kan tlawh a, hna thawktute pawh theihtawp chhuah zel turin kan fuihin kan nawr reng a ni," an ti.

Jeje Lalpekhlua chuan, NH kawng siam mek chu ZPM ṭhalaite'n an vil reng dawn tih sawiin, "Mizoram mipuite tan a kawng pawimawh tak an khawih avangin fûr ruahtui tlak hmaa siam zawh ngei a nih theih nan hma chak tak a la turin company hotute a hrilh a, hna chhia leh rintlak loh a awm chuan kan ngawi mai mai dawn lo tih kan hrilh," a ti a; mipui duhthusam ang taka kawng siam turin kawngpui siamtute a chah a ni.

ZPM Ṭhalai tarlan danin, National Highways & Infrastructure Development (NHIDCL) hnuaiah Balaji, BR Goyal leh J Infratech ten NH kawng an siam mek. Sairang-Buichali kawng khawihtu J Infratech-in hna an ṭan tawh a, cement concrete chhun tur meter 820 leh resufacing & bitumen concrete km 11 hna an ṭan tawh a, April 2026-ah zawh hman an inbeisei a ni.