Ei tur sawngbâwl chungchang zirho

Ministry of Food Processing Industries hnuaia Federation of Industry & Commerce of North Eastern Region (FINER) bultumin February 21, Inrinni khan IPR Auditorium-ah 'Regional Interaction Meet of Food Processing Industry' buatsaih a ni a; adviser to CM (Handholding) Dr KC Lalmalsawmzauva'n a hmanpui.

Dr KC Lalmalsawmzauva chuan, Mizorama kut hnathawktute chu Bána Kaih scheme hmanga thuam chak mek an nih thu a sawi a, "Ei leh bara intodelh tur leh kut hnathawktute thlai man zawka tihral a nih theih nan Mizoram sorkarin Bana Kaih scheme ṭangkai takin a hmang mek. A thawh khatnaah Bana Kaih hnuaia thlai thlan - sawhthing, aieng, hmarchate leh hmunphiah thar kawngah hmasawnna hmuh a ni a, a thawh hnihna kal mekah hian thlai tharte ṭha taka sawngbawl hna (processing)-ah ṭan lak chhoh zel tum a ni," a ti.

Bana Kaih thawh khatnaah loan component hnuaia progress partner tura thlan mi 392 hnenah loan pek a nih tawh thu sawiin Lalmalsawmzauva chuan, "Progress partner 2,713 hnenah CM Special Package sem chhuah a ni. A thawh hnihnaah progress partner 917 thlan an ni leh tawh," a ti a, progress partner ṭha leh rintlak thlan chhuah chhunzawm zel a nih thu a sawi.

Adviser to CM chuan, thlai thar vawn ṭhat nan leh him dam taka state pawna thawn chhuah nan a tuam dan (packaging) a pawimawh thu a sawi a, kalkhawmte chu proces-sing an tihnaah packaging leh a chhunga thil awm (product)-te uluk taka sawngbawl turin a chah.

Regional Interaction Meet hi FINER - Agriculture and Food Processing Committee member Francis Sailo-in a kaihruai a; Mizoram sorkar hotute leh sumdawnna bul ṭan tumte an tel. FINER chief manager Amitabh Ray-in MOFTI hnathawh dan a sawifiah a; mithiam hrang hrangin thil pawimawhte an zirtir a ni.