ILP nei/fel lo hnam dang 68 man an ni

Mizo Zirlai Pawl Gen. Hqrs,. college students union leh hnam pual zirlai pawl hruaitute chuan February 21, Inrinni zing khan Aizawla hnam dang zingah Inner Line Permit (ILP) an endik a, ILP nei lo leh fel lo eng emaw zat an hmu chhuak.

Zirlai pawlte hian Inrinni khan zing dar 7 aṭangin Kulikawn, Dawrpui (Bazar), Vaivakawn leh Bawngkawnah hnam dang (vai) an endik a; ILP nei lo leh fel lo mi 68 an hmu chhuak a, police hnenah an hlan.

MZP chuan, ILP fel lo an man zingah ILP-a inziak 'Purpose of Stay' nena inmil loa hna thawk tam tak an awm thu tarlangin, "Vai leh vai in-sponsor pasarih man an ni. Vai leh vai in-sponsor hi mak kan ti hle a, hemi chungchangah hian sorkar thuneitute hma la nghal tur leh ILP pek chhuah kawngah a ti dik lotu an awm a nih chuan, chhui chhuaha hrem ngei kan phût," an ti.

Dan loa hnam dang an dapnaah kum rei lo te chhungin thil inthlak danglam tam tak a awm thu tarlangin MZP chuan, "Hna thawk tura kal a tam zawk hi Assam registration lirthei khalhin, licence nei loa khalh tam tak an awm," an ti a; Aizawl leh a chhehvela hnam dangin lirthei an khalh tam ta lutuk pawh an vei thu an tarlang.

Sairang thlenga rêl a lo luh tawh thu sawiin MZP chuan, "Mizo mipuite harh thar a, mahni awm hmun ṭheuhah ILP check uar tur leh kan mi chhawrte ngei pawh an felfai em tih en nawn fo turin mipui kan ngen a ni," an ti.