KHAWTHLIR

KṬP-in thisen pe

February 21, Inrinni khan KṬP, Tuikhuahtlang Branch chuan KṬP Day pualin ZMCH Blood Bank tan thisen unit 59 an pe a, petute mipa 43 leh hmeichhia 16 an ni a; KṬP, Chhinga Veng East Branch pawhin an branch silver jubilee pualin Synod Hospital tan thisen unit 25 an pe a, petute mipa 19 leh hmeichhia paruk an ni. KṬP, Armed Veng Branch chuan an branch diamond jubilee pualin Civil Hospital Aizawl tan mipa 27 leh hmeichhia 16-in thisen unit 43 an pe.

Unity Run & Cycling

Art & Culture depart­ment chuan February 21, Inrinni khan Mizoram Cycling Association leh Aizawl City Run Club te nen ṭanghoin Aizawlah Ekta Diwas Unity Run & Cycling an buatsaih. Ekta Diwas Unity Run-ah mi 140 vel an tlan a, Unity Cycling-ah mi 55 an tel a; Art & Culture deputy secretary Lalengvari'n Vanapa Hall kawt aṭangin tlan turte a vailiam a ni.

DC-in My Village My World a hawng

Lawngtlai bawrhsap Donny Lalruatsanga chuan February 21, Inrinni khan Chawnhù khuaa 'My Village My World' kalpui mekah kum 2026 atana faina leh thianghlimna a hawng a; Lawngtlaiah district khaw dangte entawn tlak ni thei tura theihtawp chhuah turin Chawnhu khawtlang mipui a sawm. Hawnna inkhawm zawhah Chawnhu khawtlang chu bawlhhlawh thian faiin an hnatlâng nghal a ni.

Kumpuan hawng

Tlangnuam Vengthar Branch YMA chuan February 20, 2026 zan khan an veng Presbyterian Kohhran hall-ah YMA kumpuan 'Ruihhlo do' hawn inkhawm an buatsaih a, Central YMA president R Lalngheta'n a hawng. CYMA President chuan, ruihhlo hmanga intihausate endawng a hun tawh thu sawiin, "Tlanchhe chunga bei loin, huaisen takin kan bei let tawh tur a ni," a ti.

Damdawi man

Mamita Excise & Narcotics Department chuan February 21, Inrinni khan Mamitah dan loa zawrh khuh damdawi - COFF-TREX bûr 100 (kg 10) leh a neitua puh Laldinpuii (57) d/o Lalhnuna (L), Mamit Venghlun an man. NDPS Act, 1985 hnuaiah thubuai ziah luh a ni.