KHAWTHLIR

Bill pawm

Nimin khan Assembly session-ah Labour, Employment, Skills Development & Entrepreneurship minister Lalnghinglova Hmar bill put luh, 'The Mizoram Shops and Establishment (Regulation of Employ-ment and Conditions of Service) (Amendment) Bill, 2016 chu lungrual taka pawm a ni. Amend-ment bill-in a tum ber pakhat chu November 2025-a sorkar laipuiin Labour Codes a tihchhuah nena inmil thei tura dan siamṭhat a ni.

Mock drill nei dawn

National Disaster Res-ponse Force kaihhruaiin vawiin chawhnu dar 2 hian lirnghing a thlen palha chet dan tur tihchhinna, Earthquake Mock Drill neih a ni dawn. Staging area atan Serchhip DC Pisapui hman a ni dawn a, lirnghingin a tihchhiat tur chu Serchhip College administrative block a ni ang.

Chhiarpui training

India ram Chhiarpui 2027 atan nimin khan Lunglei, Siaha, Lawngtlai leh Hnahthial district-te tan Lunglei DC conference hall-ah ni thum awh tur 'Training & Regular Clerical Assistant Training' buatsaih a ni a; district census officer, addl district census officer, charge census officer, addl charge census officer leh regular clerical assistant mi 50 an tel.

GST training khar

National Academy of Customs, Indirect Taxes and Narcotics (NACIN), Shillong leh CGST Commissionerate ten chawlhkar hnih awh, 'Certificate Course on GST Sahyogis (Thawhpui)' chu zawh a ni a; NACIN additional director Isaac R Kharkongor-in training chhuak mi 27 hnenah certificate a hlan.

Kawng zauh tum

GAD enkawltu chief minister Lalduhoma chuan nimin khan Assembly session-ah ZPM member H Ginzalala zawhna chhangin, Assam Rifles chhuahsan ramah Aizawl traffic tâwt lutuk tihziaawmna atan Bazar Bungkawn aṭangin Treasury kawng zauh tum a nih thu a sawi a, "Saron Venga BCM biak-in aṭanga Dak Inpuia rawn chhuak tur by-pass road ruahman a ni. Motor parking pawh siam tum a ni," a ti.

Sipai lâk sawiho a ni

Mamit additional DC Carolyn LB Khiangte hoin nimin khan DC conference hall-ah Army Recruiting office hotut leh sorkar hotute'n Indian Army (Agniveer) lak rûnpui neih tur chungchang Mamit district ṭhalaite hnena puanzar dan tur sawiho a ni. Indian Army lak rûnpui atan April 1, 2026 thleng www.joinindiaarmy.nic.in/ ah dilna thehluh theih a nih thu tarlan a ni.