SWMC-a thawkte hriselna dinhmun enfiah

National Health Mission (NHM) leh Aizawl Municipal Corporation (AMC) chuan nimin khan Solid Waste Management Centre, Tuiriala thawkte hriselna dinhmun enfiahna (health check-up) an buatsaih a, mi 100 chuang hriselna dinhmun enfiah a ni.

Health checkup-ah hian specialist doctor te, Sihphir UPHC, Zemabawk UPHC, Lawipui UPHC-a doctor leh thawktu dang te, MMU Aizawl East leh Tuirial Health & Wellness Centre-a thawkte an thawk chhuak a; test chi hrang 13 vel a thlawna tih a ni. ABHA Health ID siamsak nghal zel an ni a; inentirte chu a thlawnin damdawi pek an nih bakah, an mamawh ang hri danna damdawi (vaccine) pek nghal an ni bawk.

Health checkup hi AMC joint commissioner Lalremruata Kullai-in a kaihhruai a; bawlhhlawh sawngbawlna hmuna thawkte hriselna dinhmun enfiah chu Aizawl Day (February 25) puala buatsaih a nih thu sawiin, ṭangkai taka hmang turin thawktute a chah.

Health department joint director (Family Welfare) Dr Lalawmpuia Chhangte, NUHM state nodal officer ni bawk chuan, AMC kum eng emaw zat chhung NUHM hmalaknain Solid Waste Management Centre, Tuirialah free health checkup buatsaih a nih tawh thu a sawi a, Health department-in mipui hriselna a ngaih pawimawh avangin hmun hrang hrangah free health checkup an buatsaih reng thu a sawi bawk.