Rûl chuk leh ramsa sehte ni thum chhunga hriattir tur

Environment, Forest & Climate Change (EFCC) minister Lalthansanga chuan, rûlin mihring a chuk emaw, ramsain mihring a seh a awm chuan ni thum chhungin EFCC department mi leh sate hnena hriattir tur a nih thu a sawi.

MNF member Ramthanmawia zawhna chhangin Lalthansanga chuan, kum 2025 chhungin Mizoramah rûl chuk avanga thi pakhat a awm thu a sawi a, "Zangnadawmna pek a la ni lo. Rûl chuk emaw, ramsain a sehte chu ni thum chhungin an hnaih ber EFCC department mi leh sate hnenah report tur a ni a, a nih loh chuan zangnadawmna inpek a har ṭhin," a ti.

EFCC Minister chuan INC member C Ngunlianchunga zawhna chhangin, wildlife sanctuary chhunga ramsate laka hliam emaw, thi emaw te chu danin zangnadawmna pek a remtih loh thu a sawi a, "Hei vang hian wildlife sanctuary pawh ven uluk a ni a, tlaivara vên ṭhin a ni," a ti a; miin luh rûk an tum ṭâlh erawh chuan invên sen a nih loh thu a sawi.